Danska kvikmyndin Empire hlaut kvikmyndaverðlaun Norðurlandaráðs 2023

Verðlaunin voru afhent  við verðlaunaathöfn Norðurlandaráðs í Norska óperu- og balletthúsinu á þriðjudagskvöld. Leikkonan Maria Bonnive afhenti verðlaunin. 

Handhafar kvikmyndaverðlauna Norðurlandaráðs fá verðlaunagripinn Norðurljós og verðlaunafé sem nemur 300 þúsund dönskum krónum og skipta handritshöfundur, leikstjóri og framleiðandi upphæðinni á milli sín, en það á að undirstrika að kvikmyndagerð sem listgrein er afurð náins samstarfs þessara aðila.

Það er sjaldgæft að sjá kvikmynd sem er úthugsuð af jafnmiklu sjálfsöryggi og í öllum smæstu smáatriðum. Frederikke Aspöck leikstjóri stígur hvergi feilspor. Empire veitir nýja og ferska sýn á kynþáttahyggju og valdatafl. Þungamiðja sögunnar er nýlendutímabil Danmerkur og sögusviðið Vestur-Indíar árið 1848, á eynni St. Croix.

Það ber vitni um kjark, áræðni og metnað af hálfu kvikmyndagerðarkvennanna að segja þessa alvarlegu og sársaukafullu sögu á svo persónulegan og gáskafullan hátt, jafnvel kíminn og furðu fallegan á köflum. Höfundarnir skoða liðna tíð og það er ekki fögur sjón. Í Empire segir frá afmörkuðum hluta úr danskri sögu, en jafnframt ættu áhorfendur hvaðanæva úr heiminum að eiga auðvelt með að tengja frásögnina við vandamál úr samtímanum.

Hér er á ferð sannfærandi og einkar margslungin túlkun á þrælauppreisn gegn dönskum nýlenduherrum. Persónurnar reyna að finna sér stað innan stigveldis kynþátta og stétta. Brigðular ráðagerðir og hverfult trygglyndi gera söguna ófyrirsjáanlega og grípandi. Handritshöfundurinn Anna Neye, sem leikur einnig aðalhlutverkið, hefur skapað margþætta sögu sem ekki hefur heyrst fyrr, sögu þar sem allar persónurnar hafa einhverja galla og margar þeirra eiga í innri siðferðisbaráttu.

Dómnefndin valdi Empire úr hópi norrænna kvikmynda af miklum gæðum. Í myndinni koma saman stórgott handrit, áberandi góð sjónræn frásögn og hljóðheimur sem skilar sér í magnaðri kvikmyndaupplifun. Á heildina litið hafa höfundarnir fært áhorfendum fagran, sætan og litríkan glaðning sem einnig geymir biturt eitur og stillta bræði. 

Við óskum framleiðendunum til hamingju með að hafa gert þessum sterku og frumlegu röddum kleift að heyrast í norrænum kvikmyndahúsum.

Titill á frummáli: Viften

Alþjóðlegur titill: Empire

Leikstjóri: Frederikke Aspöck

Handritshöfundur: Anna Neye

Framleiðendur: Pernille Munk Skydsgaard, Nina Leidersdorff, Meta Louise Foldager Sørensen

Framleiðslufyrirtæki: Meta Film

Alls voru sex norrænar kvikmyndir tilnefndar til verðlaunanna í ár.