Liprari greiðslur á milli landa – norrænt samstarf í brennidepli í Stokkhólmi
Niklas Wykman, ráðherra fjármálamarkaða í Svíþjóð, ásamt meðlimum Stjórnsýsluhindranahóps Norðurlandaráðs sem átti frumkvæði að samráðsfundinum.
Sameiginlegt markmið allra sem tóku þátt var að skapa heildstæðara norrænt kerfi utan um rafrænar greiðslur fyrir jafnt almenning sem fyrirtæki. Ef við ætlum okkur að verða samþættasta svæði heims verður að vera hægt að greiða með einföldum hætti, hvar sem maður er staddur á Norðurlöndum.
Niklas Wykman, ráðherra fjármálamarkaða í Svíþjóð, tók þátt í fundinum þar sem rædd voru mál sem tengdust bæði tæknilegum lausnum og þörfinni á sameiginlegu regluverki. Einkum var áhersla lögð á þrjú atriði: Að greiða fyrir millifærslum á milli banka á milli norrænna landa, að gera það einfaldara að opna bankareikning í öðru norrænu landi og að greiða fyrir snurðulausri notkun á greiðsluþjónustum á borð við Swish, Vipps og MobilePay þvert á landamærin.
Samráðsfundurinn var mikilvægt skref í átt til samþættara fjármálaumhverfis á Norðurlöndum sem er forsenda bæði hreyfanleika og vaxtar á svæðinu. Markmiðið er skýrt: Að í daglegu lífi verði jafn einfalt að sjá um fjármál sín handan landamæranna og heima fyrir.
