Næsti leikur: Norrænar umræður um metoo-hreyfinguna í menningargeiranum

30.01.19 | Fréttir
Alexandra Pascalidou
Photographer
Thron Ullberg
Blaðakonan og rithöfundurinn Alexandra Pascalidou mun stýra norrænni pallborðsumræðuröð um metoo-hreyfinguna sem hefur göngu sína í næstu viku. Norrænu menningarmálaráðherrarnir vilja sameina þann kraft sem býr í metoo-hreyfingum landanna átta og leita þannig leiða til að ná fram breytingum.

Menningarmálaráðherrarnir vilja breyta þeim innviðum menningargeirans sem hafa gert kynferðislegri áreitni kleift að viðgangast. Þetta kváðu þeir skýrt á um í sameiginlegri yfirlýsingu sinni síðasta vor, en þar hétu ráðherrarnir því að beita sér fyrir bættum forystuháttum og aukinni þekkingu á sviðum menningar, fjölmiðla og íþrótta.

Umræður í öllum Norðurlöndunum

Ráðherrarnir hafa átt frumkvæði að tveggja vikna langri röð pallborðsumræðna í öllum Norðurlöndunum, þar sem rithöfundurinn og blaðakonan Alexandra Pascalidou mun stjórna umræðum með þátttöku lykilaðila í hverju landi.

Helstu niðurstöður hverrar umræðulotu verða nýttar til frekari umræðna í næsta landi. Að umræðuröðinni lokinni verður hægt að draga upp heildarmynd af því hvar metoo-hreyfingin stendur í dag og hvaða aðgerða er þörf innan menningargeirans á Norðurlöndum. 

„Metoo-hreyfingar á Norðurlöndum hafa átt býsna ólíkar birtingarmyndir undanfarið ár. Það verður áhugavert að rýna frekar í hvað er líkt og ólíkt með hreyfingunum í löndunum,“ segir Alexandra Pascalidou.

Metoo-hreyfingar á Norðurlöndum hafa átt sér afar ólíkar birtingarmyndir undanfarið ár. Það verður áhugavert að rýna frekar í hvað er líkt og ólíkt með hreyfingunum í löndunum

Alexandra Pascalidou, rithöfundur og blaðakona

Við val á þátttakendum í pallborðsumræðurnar var áhersla lögð á persónulegar frásagnir frá liðnu ári, nýjustu rannsóknir og mögulegar breytingar til að stuðla að í vinnustaðamenningu. Meðal annars hefur þingmönnum, blaðamönnum, leikurum, fræðimönnum og rithöfundum verið boðið að taka þátt.  

Mikil áhrif á pólitíska forgangsröðun

Metoo-hreyfingin hafði mikil áhrif á forgangsröðun á mörgum sviðum norrænna stjórnmála á síðasta ári. Norrænu ráðherrarnir á sviðum jafnréttis- og vinnumarkaðsmála ýttu ýmsum verkefnum tengdum hreyfingunni úr vör.

Kortlagningin „Ett år efter Me too – initiativ och åtgärder i de nordiska och baltiska länderna“ (Ári eftir Me too – verkefni og aðgerðir í norrænu löndunum og Eystrasaltsríkjunum) leiddi til dæmis í ljós að einkum hefur verið gripið til aðgerða á fjórum sviðum. Þau svið varða nýja og uppfærða löggjöf, breytingar á skipulagi verkefna, auknar kröfur til vinnuveitenda auk kortlagningar og þekkingar.

Dagskrá

Umræðuröðin hefst þann 4. febrúar í Helsinki. Næsta umræðulota fer fram á Álandseyjum, því næst liggur leiðin um hin Norðurlöndin og verður síðasta lotan á Grænlandi. Dagskráin er eftirfarandi:     

Umræðurnar verða opnar almenningi en sætafjöldi er takmarkaður og því er nauðsynlegt að skrá sig. Einnig verður hægt að fylgjast með beinu streymi frá umræðunum og umfjöllun um þær á samfélagsmiðlum undir myllumerkinu #metookultur. Nánari upplýsingar eru á síðu hvers viðburðar. 

Contact information