Norðurlönd standi saman að HM í knattspyrnu

Norrænu knattspyrnusamböndin (Danmörk, Færeyjar, Finnland, Ísland, Noregur og Svíþjóð) hafa gert forkönnun á möguleikum þess að sækja sameiginlega um það til FIFA að halda heimsmeistaramót kvenna í knattspyrnu 2027.  Landssamböndin sex hafa slegið því föstu að ef til umsóknar komi skuli hún grundvallast á sameiginlegum norrænum gildum og vænta þess að öll sex löndin geti haldið viðburði í tengslum við keppnina. Það vekur mikla ánægju í Norðurlandaráði.

„Þetta er frábært tækifæri til að koma Norðurlöndum á kortið og þjappa okkur enn betur saman með því að vinna saman að gríðarstóru verkefni á borð við HM í knattspyrnu. Það hefur orðið sprenging í vinsældum kvennaknattspyrnu. Það ríkti algjör einhugur um það í nefndinni okkar að þetta sé tækifæri sem við eigum að grípa,“ segir Kjell-Arne Ottosson, formaður þekkingar- og menningarnefndarinnar.

Allar fjórar nefndir Norðurlandaráðs fengu kynningu á möguleikanum á sameiginlegri norrænni umsókn. Málið mæltist vel fyrir hjá nefndunum sem vilja nú senda ríkisstjórnum Norðurlanda skýr pólitísk skilaboð. Í sameiginlegri yfirlýsingu nefndanna segir meðal annars:

Nefndirnar eru þess sannfærðar að sameiginleg norræn umsókn hafi í för með sér margþættan ávinning og stuðli að margvíslegum jákvæðum áhrifum, samanborið við umsókn frá einni þjóð. Alþjóðlegum íþróttaviðburði af þeirri stærðargráðu sem HM kvenna í knattspyrnu er fylgir mikið álag á umhverfið auk þess sem hann útheimtir mikinn kostnað og mannafla. Allt kallar þetta á sjálfbærar lausnir. Með sameiginlegri umsókn er hægt að dreifa áhættunni auk þess sem öll norrænu löndin auk Færeyja fá að njóta góðs af þeim ávinningi sem slíkum viðburði fylgir.

Fulltrúar allra sex landanna sem að samstarfinu standa voru viðstaddir þing Norðurlandaráðs þar sem þeir kynntu fyrirætlanir sínar. Það verður ekki fyrr en að að minnsta kosti einu ári liðnu sem endanleg ákvörðun verður tekin um það hvort senda skuli inn sameiginlega umsókn en stuðningur Norðurlandaráðs hefur mikla þýðingu fyrir landssamböndin.

„Stuðningurinn sem við finnum frá Norðurlandaráði gleður okkur mjög. Að gildum á borð við jafnrétti og sjálfbærni sé gert hátt undir höfði fellur mjög vel að fyrirætlunum okkar,“ segir Karl Erik Nilsson, forseti sænska knattspyrnusambandsins.

Oft er litið til Norðurlanda sem fyrirmynda í skipulagðri kvennaknattspyrnu en í samanburði við karlaknattspyrnu er enn mjög ólíku saman að jafna. HM á heimavelli getur stuðlað að auknum vinsældum og fjármögnun en það er veigamikill þáttur í stuðningi nefndanna við starf landssambandanna.

„Eftir að hafa fengið þessa kynningu gerum við okkur grein fyrir því hversu stór þessi viðburður er og hversu mikil lyftistöng hann væri fyrir ferðaþjónustu. Þetta er tækifæri til að koma Norðurlöndum á kortið með alveg nýjum hætti. Það er ánægjulegt að sjá hversu margar borgir vilja taka þátt. Það þýðir að það verður samkeppni um það og við þurfum ekki að neyða neinn til þátttöku,“ segir Pyri Niemi, formaður Norrænu hagvaxtar- og þróunarnefndarinnar.

Niemi vill fá ríkisstjórnir allra Norðurlanda að borðinu og hyggst senda bréf til samstarfsráðherra Norðurlanda til að undirstrika mikilvægi þess að fá stuðning ríkisstjórnanna.