Norrænir dómsmálaráðherrar: Samfélagsöryggi og viðnámsþróttur efla réttarríkið og lýðræði
Yfirlýsingin byggir á yfirlýsingu norrænu forsætisráðherranna frá því í maí 2025 um að efla viðnámsþrótt og tryggja skilvirkar almannavarnir. Bent er á norræna líkanið, með öflugar lýðræðislegar stofnanir, mikið traust og samstarf á milli landa, sem grundvöll til þess að takast á við áskoranir í framtíðinni.
„Ég tel mikilvægt að við norrænu dómsmálaráðherrarnir skuldbindum okkur í sameiningu til þess að efla samfélagsöryggi, traust til yfirvalda og viðnámsþol lýðræðisins og réttarríkisins. Við verðum áfram að vinna náið saman og miðla góðum starfsháttum og efla samstarf á milli stofnana til þess að berjast gegn hryðjuverkum, net- og fjölþátta ógnum og koma í veg fyrir brotastarfsemi á milli landa, spillingu og mansal,“ segir Leena Meri, dómsmálaráðherra Finnlands.
Ráðherrarnir undirstrika að standa verði vörð um grundvallarfrelsi og -réttindi, einnig við óvenjulegar aðstæður. Efla á viðnámsþol samfélagsins með fyrirbyggjandi aðgerðum gegn ofbeldisfullri öfgahyggju, hryðjuverkum, gengjamyndun og öfgavæðingu. Jafnframt á að viðhalda trausti almennings til yfirvalda en það er lykilatriði í því að geta tekist sameiginlega á við krísur.
Í norrænu samstarfsáætluninni á sviði dómsmála 2025–2030 eru nokkur forgangssvið nefnd:
- Skipti á upplýsingum um net- og fjölþátta ógnir: Löndin munu skiptast á góðum starfsháttum og efla samstarfið á milli helstu stofnana til að takast sameiginlega á við ógnir.
- Barátta gegn brotastarfsemi þvert á landamæri: Skipulögð glæpastarfsemi, spilling og mansal kallar á samhæfingu á bæði pólitísku stigi og embættismannastigi.
- Traust sem grundvöllur viðnámsþróttar: Öflugt traust á milli almennings, yfirvalda og borgaralegs samfélags skiptir sköpum fyrir viðbúnað samfélagsins.
- Regluleg afgreiðsla mála er varða viðbúnað: Mál sem varða viðbúnað verða reglulega tekin upp á norrænum fundum og í starfshópum.
Undir yfirlýsinguna skrifa dómsmálaráðherrar Danmerkur, Finnlands, Íslands, Noregs, Svíþjóðar, Færeyja og Álandseyja.
