Norrænn styrkur til fjölmiðla á rússnesku í Eystrasaltsríkjum

Norræna samstarfsnefndin ræddi fjölmiðlaáætlunina fyrir Eystrasaltsríkin á fundi sínum 28.10. og ákvað að verja rúmlega tveimur milljónum danskra króna til þess að halda áætluninni áfram fram til loka árs 2021.

„Það er hagur Norðurlandanna að styðja verkefni í Eystrasaltslöndunum sem styðja möguleika rússneskumælandi minnihluta til að taka þátt í samfélagsþróun landanna við Eystrasalt,“ segir Paula Lehtomäki, framkvæmdastjóri Norrænu ráðherranefndarinnar.

Fjölmiðlaáætlunin fyrir Eystrasaltslöndin hefur fram til þessa verið þríþætt. Þar hefur verið um að ræða menntun blaðamanna, fjölmiðlafræði aðallega fyrir ungt fólk og styrki til óháðrar fjölmiðlunar. Nú er verið að fjármagna áætlun sem eingöngu beinist að styrkjum til fjölmiðlunar.

Styrkir eru veittir í kjölfar umsókna og eru veittir til vandaðrar fjölmiðlunar á rússnesku í Lettlandi, Eistlandi og Litháen. Markmiðið er að auðvelda aðlögun rússneskumælandi íbúa að nærsamfélaginu með þessum hætti og veita rússneskumælandi fólki betri tækifæri til að taka virkan þátt í pólitískum ákvörðunum og umræðum.

Sérstakri stuðningsáætlun fyrir rússneskumælandi rásina ETV+ á almannaþjónustustöðinni ETV í Eistlandi verður fram haldið.