Tíu stjórnsýsluhindrunum var rutt úr vegi 2015
Stjórnsýsluhindranaráðið var skipað af ríkisstjórnum Norðurlanda árið 2014. Hlutverk þess er að beina sjónum að hindrunum sem takmarka frjálsa för einstaklinga og fyrirtækja á Norðurlöndum og fylgja þeim eftir þangað til þau ráðuneyti sem málið varðar hafa lokið meðferð á þeim.
Markmiðið er að skapa störf og hagvöxt og efla samkeppnishæfni Norðurlanda á alþjóðavettvangi.
Ábatasöm viðskipti
Um sjötíu þúsund norrænir ríkisborgarar starfa í öðru landi en búsetulandinu. Vinnuframlag þeirra sem sækja störf yfir landamæri á Norðurlöndum er nú þegar mikils virði fyrir efnahaginn og skilar 5,6 milljörðum evra á ári.
Árið 2014 setti Stjórnsýsluhindraráðið 29 stjórnsýsluhindranir í forgang og tókst að ryðja þremur þeirra úr vegi.
Árið 2015 tókst að leysa tíu af þeim 36 stjórnsýsluhindrunum sem voru í forgangi. Tvær voru afskrifaðar vegna þess að ríkisstjórnirnar sáu enga leið til að leysa þær.
Ferli sem virkar
„Þetta er góður árangur. Ferlið virkar,“ segir Risto EJ Penttilä, fulltrúi atvinnulífsins í Finnlandi, sem um áramótin tók við formennsku í Stjórnsýsluhindranaráðinu af Dananum Ole Stavad.
Hver meðlimur Stjórnsýsluhindranaráðsins tekur fyrir þrjár til fimm stjórnsýsluhindranir á hverju ári og sér um að fylgja þeim eftir þangað til þau ráðuneyti sem málið varðar veita skýr svör um það hvort hægt sé að finna lausn á hindruninni.
Oftast eru það svæðisbundnu upplýsingaskrifstofurnar á landamærasvæðunum eða upplýsingaþjónustan Halló Norðurlönd sem uppgötva hindranirnar og skrá þær í gagnagrunninn um stjórnsýsluhindranir og láta skrifstofu Stjórnsýsluhindranaráðsins vita.
Áhersla á hagvöxt
Í ársskýrslu Stjórnsýsluhindranaráðsins fyrir árið 2015 er nánar sagt frá þeim stjórnsýsluhindrunum sem rutt hefur verið úr vegi og frá stöðu annarra stjórnsýsluhindrana sem eru í forgangi.
Árið 2016 ætlar Stjórnsýsluhindranaráðið að eiga nánara samráð en áður við aðila vinnumarkaðarins.
„Ég vil að stjórnsýsluhindrunum sem hamla hagvexti verði rutt úr vegi fyrst,“ segir Risto EJ Penttilä,
Skýrslan í heild sinni:
Senda má spurningar og athugasemdir til
Claes Håkanssons, ráðgjafa á skrifstofu Stjórnsýsluhindranaráðsins: +45 29 69 29 20 clha@norden.org