Taktu þátt og hafðu áhrif á næsta lífsnauðsynlega alþjóðasamninginn!
Tíðindi ársins 2019 um að ein milljón plöntu- og dýrategunda væru í útrýmingarhættu var líklega ein stærsta vísindafrétt ársins.
Í maí kom út yfirgripsmikil og ógnvænleg skýrsla rannsóknarnefndar Sameinuðu þjóðanna um líffræðilega fjölbreytni sem sýndi fram á að plöntu- og dýrategundir deyja út með meiri hraða en nokkru sinni fyrr.
Endurreisn náttúrunnar kallar á róttækar aðgerðir.
Ný alþjóðleg markmið eiga að snúa þróuninni við
Á næsta ári verður verður gerður nýr alþjóðasamningur um líffræðilega fjölbreytni sem á að snúa þessari þróun við og stöðva eyðingu vistkerfa og útrýmingu tegunda.
Allar þjóðir sem hafa undirritað samning Sameinuðu þjóðanna um líffræðilega fjölbreytni (CBD) koma saman í október 2020 í Kunming í Kína til þess að sameinast um ný markmið á sviði náttúruverndar.
Undirbúningurinn er þegar kominn á fullt skrið.
Ungt fólk á Norðurlöndum getur haft áhrif á samninginn
Enn er tækifæri til þess að hafa áhrif á innihald samningsins og til þess að auðvelda þátttöku ungs fólks í ferlinu hefur norræna samstarfið búið til fræðsluefni, eða verkfæri, og möguleika til að halda ungmennaráðstefnur og hafa áhrif á innihald samningsins.
Í fræðsluefninu er tekið saman það nýjasta úr vísindunum. Þá er þar að finna margar lykilspurningar varðandi samningaviðræðurnar sem tækifæri gefst til að svara og koma svörunum áleiðis stafrænt.
Er til á sjö norrænum málum
Verkfærið varð til í samstarfi við alþjóðlegu náttúruverndarsamtökin, WWF. Það er til á ensku og sjö norrænum málum.
Allir geta hlaðið verkfærinu niður endurgjaldslaust og aflað sér þannig þekkingar og svarað spurningum og sent til norræna samstarfsins. Niðurstöðurnar verða notaðar í samningaviðræðunum.
Nokkrar ungmennaráðstefnur
Lítil ungmennaráðstefna var haldin í Stokkhólmi í tengslum við Nordic Climate Actions weeks í desember.
Stærri ungmennaráðstefna verður haldin í Kaupmannahöfn 9. janúar og í kjölfarið verða haldnar stærri ungmennaráðstefnur í Svíþjóð, Noregi og Finnlandi.
