Sjúkradagpeningar á Álandseyjum

Sjúkradagpeningar bæta upp tekjumissi einstaklinga á aldrinum 18 til 67 ára sem geta ekki sinnt vinnu sinni vegna sjúkdóms. Réttur til sjúkradagpeninga getur einnig skapast við aðrar aðstæður, til dæmis við nám eða atvinnuleysi. Sjúkradagpeningar eru yfirleitt greiddir í um eitt ár að hámarki. Upphæðin og greiðslutíminn fara eftir tekjum og hve lengi óvinnufærnin varir. Samkvæmt vinnuréttarlögum og kjarasamningum eiga starfsmenn rétt á launuðu sjúkraleyfi frá vinnuveitanda vegna veikindafjarveru.

Á Álandseyjum gilda finnskar reglur um sjúkradagpeninga. Nánari upplýsingar um greidd sjúkraleyfi, sjúkradagpeninga við flutning til eða frá Álandseyjum eða Finnlands, vinnuslys og atvinnusjúkdóma er að finna á síðunni „Sjúkradagpeningar í Finnlandi“.

Ef hámarki greiddra sjúkradagpeninga frá FPA hefur verið náð, sjúkraleyfið heldur áfram og sótt hefur verið um lífeyri eða endurhæfingarstuðning eða umsókninni hafnað er hægt að sækja um almennan stuðning frá miðstöð vinnumarkaðar og námsaðstoðar á Álandseyjum (AMS). Ef þú átt aðild að atvinnuleysistryggingasjóði sækir þú um tekjutengda dagpeninga hjá honum.

Fyrst er hægt að sækja um almennan stuðning þann dag er rétti til sjúkradagpeninga lýkur, að því gefnu að tilkynning um að vera í atvinnuleit hafi verið send til AMS. Fylgigögn á borð við staðfestingu á atvinnu og afrit af veikindavottorði sem sýnir að sjúkraleyfið haldi áfram þurfa að fylgja umsókninni. Það hvaða gögn þurfa að fylgja með fara eftir aðstæðum umsækjanda. Upplýsingar um hvaða fylgigögn eiga við og aðrar upplýsingar um hámark sjúkradagpeninga er að finna á vef AMS.

Á síðu Info Norden má finna upplýsingar um sjúkradagpeninga í öðrum norrænum löndum og samskiptaupplýsingar þeirra stofnana sem geta svarað spurningum.