Hvernig er hægt að draga úr losun vegna neyslu á Norðurlöndum?

Tillögur skýrslunnar voru ræddar í pallborðsumræðum í norræna skálanum á COP29 í Bakú, þar sem tóku þátt þingmenn frá bæði Svíþjóð og Noregi. Einnig tók Dan Koivulaakso, deildarstjóri hagvaxtar- og loftslagsmálasviðs Norrænu ráðherranefndarinnar, þátt í umræðunum. Að sögn hans ber skýrslan vott um mikinn metnað og inniheldur hún um eitt hundrað tillögur að því hvernig draga megi úr losun á mismunandi sviðum.

„Það er engin ein töfralausn til sem getur dregið úr losun eins hratt og mikið og þörf er á heldur snýst þetta um að finna blöndu út frá þessari umfangsmiklu verkfærakistu,“ segir hann. 

Sænska þingkonan Jytte Guteland benti á að norræna velferðarsamfélagið hafi lengi veitt almenningi öryggi sem hefur þýtt að hægt hefur verið að innleiða samfélagslegar breytingar með árangursríkum hætti. Hún kallar eftir áherslu á að umskipti yfir til kolefnishlutleysis verði með eins réttlátum hætti og hægt er.

Í sama streng tók norski þingmaðurinn Lars Haltbrekken sem benti á mikilvægi þess að heildaráhrif nýrra reglna stuðli ásamt skattkerfinu að því að bæði draga úr losun og auka jöfnuð í samfélaginu.

Guteland sagði einnig að þótt norrænu löndin séu ekki með sameiginlegt löggjafarþing gætu tillögur og hvatning á milli landanna stuðlað að þróun í rétta átt. Karin Lexén, framkvæmdastjóri sænsku náttúruverndarsamtakanna, sagði norrænu löndin einnig hafa tækifæri til þess að breyta narratífunni og setja fordæmi á alþjóðavettvangi. 

„Norrænu löndin eiga þess nú tækifæri að vera í fararbroddi þegar kemur að loftslagsmálum og vísa veginn fyrir Evrópu og heiminn allan,“ sagði hún.

Koivulaakso tók undir þetta og benti á Norrænar næringarráðleggingar frá Norrænu ráðherranefndinni sem dæmi um tillögur sem reynst hafa vel í norrænu löndunum og á alþjóðavísu vegna þess trausta vísindalega grunns sem þær eru reistar á.