Ungt fólk fyrir vonbrigðum með ákvarðanir um fjármögnun á COP29 – landsbundnar aðgerðaáætlanir næstar á dagskrá

Margt ungt fólk sem tók þátt í umræðum í norræna skálanum lýsti áhyggjum sínum af því að útlit væri fyrir niðurstaða COP29 yrði sú að löndin gætu ekki náð samkomulagi um þá 1300 milljarða bandaríkjadala sem þörf er á fyrir loftslagssjóðinn.

„Ég er vonsvikin yfir því að það virðist vera lengra á milli viðræðuaðila en talið var og ég óttast að það leiði til vantrausts sem skapi stærri gjá á milli ríkjanna í suðri og ríkjanna í norðri,“ sagði Lisa Coermann Nygaard, sendifulltrúi ungs fólks frá Danmörku.

Undir þetta tekur sendifulltrúi ungs fólks frá Suður-Afríku, Sibusiso Mazomba, sem bendir á að loftslagsbreytingar komi verst niður á fátækum löndum en að ríku löndin, sem ábyrg eru fyrir mestri losuninni, þurfi að axla sína ábyrgð.

„Við þurfum hnattrænt réttlæti,“ segir hann.
Hann segir ungt fólk einnig eiga að fá enn stærra hlutverk við samningaborðið.

Uchenna Igwe frá Centre for Journalism Innovation and Development segir að tímabært sé að ríku löndin í norðri átti sig á því að loftslagsbreytingar hafi nú þegar áhrif á líf milljóna manna.

„Og vandinn færist sífellt nær, líka fyrir löndin í norðri,“ bætir hann við.

Á síðasta degi loftslagsráðstefnunnar heimsótti yfirsamningamaður Svíþjóðar, Mattias Frumerie, einnig norræna skálann. Samningaviðræður stóðu enn yfir en hann taldi að einhvers konar lausn myndi nást en benti jafnframt á að um væri að ræða miklar málamiðlanir og að margir yrðu fyrir vonbrigðum. Hann vakti athygli á þeim hægfara skrefum sem þó eru tekin.

„Ef litið er til lengra tímabils þá stefndi í það fyrir Parísarsamkomulagið 2015 að hækkun á heimsvísu yrði meiri en 4 gráður en miðað við núverandi aðgerðir er útlit fyrir að hún verði 3 gráður. Þótt við eigum enn langt í land með að ná markmiðinu um 1,5 gráður höfum við nálgast það nokkuð.“

Fyrir COP30 sem fram fer í Brasilíu á næsta ári eiga öll aðildarríki að leggja fram ítarlega landsáætlun um hvernig þau hyggist draga úr losun hjá sér. Mattias segir mjög mikilvægt að þetta gerist sem fyrst og einnig að menn komi sér saman um kerfi til þess að leggja mat á áætlanirnar.

„Við verðum að beina sjónum meira að innleiðingu þess sem þegar hefur náðst samkomulag um og ríku löndin verða að taka ábyrgð. Við verðum að geta sýnt að það leiði einnig til betri og sjálfbærari samfélaga fyrir þau.“

Lisa Coermann Nygaard vonast líka til þess að löndin leggi landsáætlanir sínar fram í tæka tíð og að þær verði metnaðarfullar. Hún er líka með hugmynd um það hvernig hægt sé að vinna að því til lengri tíma að ná markmiðinu um 1,5 gráður.

„Í öllum skólum ætti að vera kennsla um loftslagsmál til þess að ungt fólk fái skýra mynd af því hvaða afleiðingar loftslagsbreytingar hafa og hvað þarf til þess að stöðva þær,“ segir hún.