Varðhundur og mikilvægur samstarfsaðili

Það er Norrænu ráðherranefndinni mikilvægt að raddir hins borgaralega samfélags fái að heyrast til að tryggja að vinna okkar að Framtíðarsýn 2030 sé gagnsæ, viðeigandi og árangursrík.

Vinna samstarfsnetsins hófst í september og fundinn sátu Thomas Blomqvist, norrænn samstarfsráðherra Finnlands, og Paula Lehtomäki, framkvæmdastjóri Norrænu ráðherranefndarinnar.

„Norræna ráðherranefndin vill efla rödd hins borgaralega samfélags og auka þátttöku þess í norrænu samstarfi með því að koma á norrænu samstarfsneti borgaralegra samtaka. Það er mikilvægt að rödd borgaralega samfélagsins heyrist og að það taki virkan þátt, og að stjórnmálamenn leyfi hugmyndum þess að hafa áhrif á ákvarðanir sem eru teknar í norrænu samstarfi,“ segir Paula Lehtomäki.

Sænsku samtökin Global Utmaning hafa tekið að sér að hafa umsjón með norrænu samstarfsneti borgaralegra samtaka. Global Utmaning er óháð hugveita sem vinnur að sjálfbærri þróun með félagsleg, efnahagsleg og umhverfisleg sjónarmið í huga. Meðlimir samstarfsnetsins munu sjálfir ákveða í haust hvernig samstarfi verður háttað milli þeirra annars vegar og milli þeirra og Norrænu ráðherranefndarinnar hins vegar.

Samstarfsnet borgaralegra samtaka felur í sér einstakt tækifæri til að skapa ný tengsl innan og milli norrænu landanna og gefa borgarasamfélaginu skýrara hlutverk í vinnunni að því að gera Norðurlönd að sjálfbærasta og samþættasta svæði heims. Markmið okkar er að samstarfsnetið verði að óháðum samtökum norrænna stofnana og samtaka sem ígrunda og veita vinnu Norrænu ráðherranefndarinnar aðhald og innblástur. Með því að hvetja til gagnlegrar þróunar munu meðlimir samstarfsnetsins einnig undirbúa jarðveginn fyrir verkefni framtíðarinnar og samstarf sem eflir sjálfbærniumskipti á Norðurlöndum,“ segir Joel Ahlgren, verkefnisstjóri samstarfsnets borgaralegra samtaka hjá Global Utmaning.

Norræna ráðherranefndin leggur áherslu á samstarfsnet borgaralegra samtaka endurspegli eins mörg svið og mögulegt er.

„Samstarf er styrkleikamerki. Verkfræðisamtök á Norðurlöndum hafa lengi kallað eftir samstarfsneti borgaralegra samtaka fyrir tilstilli Norrænu ráðherranefndarinnar. Við lítum á samstarfsnetið sem mikilvægan vettvang þar sem hægt er að miðla þekkingu, hafa áhrif á ákvarðanatöku í stjórnmálum og þróa nýjar hugmyndir. Verkfræðingar gegna mikilvægu hlutverki í vinnu Norðurlanda að því að ná heimsmarkmiðum um sjálfbæra þróun og uppfylla hina metnaðarfullu Framtíðarsýn okkar 2030. Við vitum að bestu lausnirnar verða til í samvinnu innan norræns samstarfs,“ segir Inese Podgaiska, framkvæmdastjóri Samtaka verkfræðinga á Norðurlöndum.

Samtökin eru úr öllum hlutum samfélagsins en meginþemað eru viðfangsefni sem snúa að grænum, samkeppnishæfum og félagslega sjálfbærum samfélögum.

„Á Norðurlöndum er hefð fyrir uppbyggilegu samstarfi milli hins borgaralega samfélags og ríkisstjórna. Þess vegna erum við hjá LGBT+ Danmark virkilega ánægð að sjá Norrænu ráðherranefndina styrkja þessa norrænu hefð. Reynsla okkar er sú að bestu og traustustu lausnirnar verða til með samstarfi mismunandi hagsmunahópa og samtaka. Það gleður okkur að hafa verið með í ráðum og erum stolt af því að fá að vera fulltrúar LGBT+ fólks í samstarfsnetinu og samstarfinu við Norrænu ráðherranefndina,“ segir Andreas Nielsen, yfirstjórnmálaráðgjafi hjá LGBT+ Danmark.