Nám á háskólastigi í Finnlandi
Í Finnlandi eru tvenns konar skólar á háskólastigi: iðnháskólar og háskólar. Kennt er á finnsku, sænsku og ensku.
Sótt er um háskólanám á þjónustuvefnum StudyInfo (Opintopolku á finnsku), en þar eru einnig upplýsingar um námsframboð á öðrum skólastigum.
Á þessa síðu hefur verið safnað upplýsingum um nám á háskólastigi, hvernig sækja má um það, um skiptinám og fleira. Ef þú hefur áhuga á háskólanámi á Álandseyjum skaltu kynna þér efni síðunnar Leiðbeiningar: Nám á Álandseyjum.
Iðnnám á háskólastigi í Finnlandi
Nám í finnskum iðnháskólum er skipulagt út frá þörfum vinnumarkaðarins. Finnskir iðnháskólar veita menntun í iðngreinum og fleiri greinum. Menntaskóla- eða iðnskólapróf veitir réttindi til náms við iðnháskóla. Námið í iðnháskólum er meira í ætt við menntaskólanám en háskólanám og í því felast fimm mánuðir af starfsnámi. Upplýsingar um einkunnagjöf eru á síðunni Einkunnaskalar í Finnlandi.
Iðnnám á háskólastigi er án endurgjalds fyrir ríkisborgara aðildarlanda ESB og EES og Sviss. Ríkisborgarar annarra landa gætu þurft að greiða skólagjöld.
Í flestum finnskum iðnháskólum er kennt á finnsku en í sumum skólum fer þó öll kennsla fram á sænsku. Að auki bjóða margir iðnháskólar upp á námsleiðir á ensku. Skólar á háskólastigi gera mismunandi kröfur um tungumálakunnáttu og er umsækjendum ráðlagt að kynna sér stefnu þess skóla sem sækja á um nám við.
Það tekur þrjú og hálft til fjögur og hálft ár að ljúka grunnnámi við iðnháskóla og hluti námsins samanstendur af starfsnámi. Til að fá inngöngu í framhaldsnám við iðnháskóla þarf nemandi að hafa lokið grunnnámi sem veitir réttindi til náms við viðkomandi deild og auk þess starfað innan viðkomandi greinar í að minnsta kosti tvö ár. Það tekur eitt til eitt og hálft ár að ljúka framhaldsnámi við iðnháskóla í fullu námi.
Nánari upplýsingar um iðnháskólanám eru á vefsvæði StudyInfo.
Háskólar í Finnlandi
Kennsla í háskólanámi grundvallast á fræðilegum eða listrænum rannsóknum. Háskólanámi er ætlað að efla færni nemenda í vísindalegri hugsun. Háskólanám til gráðu samanstendur yfirleitt af námi í aðal- og aukafögum, námi í tungumálum og tjáskiptum, starfsnámi og lokaritgerð. Upplýsingar um einkunnagjöf finnur þú á síðunni Einkunnaskalar í Finnlandi.
Viðmiðunartími til að ljúka grunnnámi (kandídatsnámi) í háskóla er þrjú ár, en tvö ár til að ljúka framhaldsnámi (meistaranámi). Í flestum námsleiðum er gengið út frá því að það taki alls sjö ár að hámarki að ljúka grunn- og meistaranámi. Að meistaranámi loknu er hægt að sækja um frekara framhaldsnám, svo sem doktorsnám eða löggildingarnám.
Háskólar eru ýmist ein- eða tvítyngdir, þ.e. kennsla fer fram á finnsku og/eða sænsku. Eins er töluvert um kennslu og rannsóknir á ensku.
Háskólanám er án endurgjalds fyrir ríkisborgara frá aðildarlöndum ESB og EES og Sviss. Ríkisborgarar annarra landa gætu þurft að greiða skólagjöld. Þeim nemendum sem stunda grunn- eða framhaldsnám við háskóla er skylt að eiga aðild að nemendafélagi og greiða því félagsgjald.
Nánari upplýsingar um háskólanám eru á vefsvæði StudyInfo.
Að sækja um nám á háskólastigi í Finnlandi
Umsóknartími um nám á finnsku og sænsku í iðnháskólum og háskólum er að vori og hausti í sameiginlegri rafrænni umsóknalotu á vefsvæðinu StudyInfo. Fyrir sumar námsleiðir á öðrum tungumálum er umsóknarlota í janúar. Nánari upplýsingar eru á vefsvæði StudyInfo.
Margar námsleiðir á meistarastigi, einkum þær enskumælandi, eru þó ekki inni í sameiginlega umsóknakerfinu heldur þarf að sækja um gegnum viðkomandi skóla. Nánari upplýsingar um námsleiðir á ensku eru á vefsvæði Study in Finland.
Norðurlandasamningurinn um aðgang að æðri menntun tryggir öllum íbúum Norðurlanda jafnan umsóknarrétt til náms við opinberar háskólastofnanir í öðrum norrænum löndum á sömu eða sambærilegum forsendum og heimamönnum. Þú getur því sótt um nám í iðnháskóla eða háskóla í sömu umsóknalotu og finnskir umsækjendur. Kynntu þér Norðurlandasamninginn um aðgang að æðri menntun.
Flestir þeirra nemenda sem fá inngöngu í grunnnám í finnskum iðnháskólum komast inn á grundvelli útskriftar sinnar úr framhaldsskóla. Aðrir nemendur komast inn á grundvelli inntökuprófa.
Ef þú hefur lokið framhaldsskólanámi í öðru landi en Finnlandi og hefur ekki European Baccalaureate-gráðu (EB) eða International Baccalaureate-gráðu (IB) getur þú ekki fengið inngöngu í nám á háskólastigi í Finnlandi út á stúdentsskírteini eitt og sér. Þá getur þú fengið inngöngu á grundvelli inntökuprófs. Hafir þú lokið EB- eða IB-gráðu finnur þú upplýsingar um mat á einkunnum þegar sótt er um háskólanám á síðunni Einkunnaskalar í Finnlandi.
Einnig er sótt um inngöngu í iðnháskóla í sameiginlegri rafrænni umsóknalotu.
Nánari upplýsingar eru á vefsvæði StudyInfo.
Flestir þeirra nemenda sem fá inngöngu í nám í finnskum háskólum komast inn á grundvelli stúdentsprófs. Aðrir nemendur komast inn á grundvelli inntökuprófa eða eftir öðrum leiðum, svo sem vegna námsárangurs í opna háskólanum. Nánari upplýsingar eru á vefsvæði StudyInfo.
Ef þú hefur lokið framhaldsskólanámi í öðru landi en Finnlandi og hefur ekki European Baccalaureate-gráðu (EB) eða International Baccalaureate-gráðu (IB) getur þú ekki fengið inngöngu í háskóla í Finnlandi út á stúdentsskírteini eitt og sér. Þá getur þú fengið inngöngu á grundvelli inntökuprófs. Hafir þú lokið EB- eða IB-gráðu finnur þú upplýsingar um mat á einkunnum þegar sótt er um háskólanám á síðunni Einkunnaskalar í Finnlandi.
Almenna reglan í finnskum háskólum er að með inngöngu í grunnnám í háskóla öðlist fólk einnig rétt til að stunda framhaldsnám við sama háskóla. Ekki er sótt um framhaldsnám við háskóla í sameiginlegri umsóknarlotu háskólanna, heldur í sérstakri umsóknarlotu innan hvers háskóla. Nánari upplýsingar eru á vefsvæði StudyInfo.
Ef þú hefur lokið framhaldsskólanámi annars staðar en í Finnlandi þarftu að senda afrit af útskriftarskírteini með umsókn þinni. Ef skírteinið er á öðru tungumáli en finnsku, sænsku eða ensku þarft þú líka að senda löggilta þýðingu á finnsku, sænsku eða ensku.
Menntastofnanir ráða sjálfar forsendum sínum fyrir nemendavali og forsendurnar geta verið mismunandi eftir háskólum og námsleiðum. Á sumum námsleiðum eru takmarkanir sem tengjast viðkomandi starfssviði. Sumar námsleiðir taka aðeins inn nemendur sem hafa nægilega hreysti og líkamlega færni til að sinna verklegum þáttum námsins. Í sumum tilvikum er þess krafist að umsækjendur framvísi vottorði um að hafa staðist vímuefnapróf, eða hreinu sakavottorði. Upplýsingar um takmarkanir sem tengjast tilteknum starfsgreinum er að finna í lýsingu á viðkomandi námi.
Athugaðu að ekki er víst að umsækjendur í nám verði boðaðir sérstaklega í inntökupróf, heldur þurfa þeir sjálfir að leita sér upplýsinga um stað og stund prófs fyrir það nám sem sótt hefur verið um. Þær upplýsingar er yfirleitt auðvelt að finna á heimasíðum háskólanna.
Langar þig í skiptinám til Finnlands eða frá Finnlandi til annars lands?
Í háskólanámi í Finnlandi hefur þú möguleika á að taka hluta af náminu í öðru landi. Yfirleitt er sótt um skiptinám gegnum þann skóla sem viðkomandi er í. Á meðal þekktustu skiptinámsáætlananna eru Erasmus+ og Nordplus. Þú getur fengið námsstyrk til skiptináms, og auk þess getur styrkur frá þínum háskóla verið innifalinn í skiptiáætluninni. Lengd skiptináms er yfirleitt ein önn eða eitt skólaár. Fáðu nánari upplýsingar um skiptinám á háskólastigi hjá þínum háskóla eða kynntu þér málið á vefsvæði StudyInfo.
Að skiptinámi loknu skaltu sækja um að einingarnar sem þú laukst í skiptináminu verði metnar inn í námið þitt heima. Nánari upplýsingar færðu hjá þinni menntastofnun.
Hvað þarf ég að vita um nám í Finnlandi?
Ef þú kemur til náms í Finnlandi er gott að hafa upplýsingar um húsnæðismál námsmanna, fjármögnun náms og skattlagningu, starfsnám, heilbrigðisþjónustu og almannatryggingar, auk afslátta fyrir námsmenn í Finnlandi. Við höfum safnað saman upplýsingum um þessi atriði á síðuna Leiðbeiningar: Nám í Finnlandi.
Viðurkenning á prófgráðum í Finnlandi
Háskólar ráða sjálfir hvernig þeir meta nám erlendis inn í námsleiðir sínar. Norræni samningurinn um æðri menntun tryggir þó að háskólar á Norðurlöndum viðurkenni nám sem lokið hefur verið við aðra norræna háskóla. Nánari upplýsingar eru á síðunni Norðurlandasamningurinn um aðgang að æðri menntun.
Upplýsingar um viðurkenningu á prófgráðum í Finnlandi, eða það í hvaða tilvikum þarf að sækja um sérstakan úrskurð til að prófgráða frá öðru landi verði viðurkennd í Finnlandi eða starfsréttindi þar staðfest, eru á síðunni Viðurkenning á starfshæfni og erlendum prófgráðum í Finnlandi.
Háskólar ráða sjálfir hvernig þeir meta nám erlendis inn í námsleiðir sínar. Það borgar sig að kanna með góðum fyrirvara hvaða fylgiskjala er krafist til þess að háskóli í Finnlandi geti viðurkennt nám frá öðru norrænu landi.
Nánari upplýsingar um viðurkenningu á námi frá öðru landi í Finnlandi eru á vefsvæði fræðsluráðs í Finnlandi. Nánari upplýsingar um námsleiðir á ensku eru á vefsvæðinu Study in Finland.
Það er alþjóðlegt verklag við viðurkenningu prófgráða að sú stofnun sem sótt er um nám við sjái um að meta prófgráðu frá öðru landi og þá hæfni sem hún veitir.
Einnig er hægt að óska eftir því að Fræðsluráð Finnlands veiti sérstakar umsagnir um gráður sem lokið hefur verið í Finnlandi. Fræðsluráð veitir, gegn gjaldi, faglega umsögn um finnskar námsgráður sem nota má í öðrum löndum. Hægt er að veita umsögn um nám sem lokið hefur verið og ef fagið fellur undir stjórnsýslusvið fræðslu- og menningarmálaráðuneytisins í Finnlandi.
Nánari upplýsingar eru á vefsvæði Fræðsluráðs í Finnlandi (Opetushallitus).
Nám á háskólastigi í öðrum norrænum löndum
Á þessum síðum finnur þú upplýsingar um nám á háskólastigi í öðrum norrænum löndum.
Nánari upplýsingar
Ef þú ert með spurningu eða ef þú hefur rekist á hindrun í norrænu landi skaltu fylla út eyðublað okkar.
ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.