Atvinnuleit í Finnlandi

Þú getur sótt um vinnu í Finnlandi eða frá öðru landi áður en þú kemur til Finnlands. 

Þú getur líka komið atvinnulaus/t til Finnlands meðan á atvinnuleit stendur og fengið þar atvinnuleysisbætur, en þá þarftu að skrá þig atvinnulaust/a/n í brottfararlandinu með góðum fyrirvara áður en þú kemur til Finnlands. Nánari upplýsingar  eru hér fyrir neðan, undir liðnum „Atvinnulaus til Finnlands í atvinnuleit“.

Almennar upplýsingar um það að starfa í Finnlandi eru á síðunni Leiðbeiningar: að starfa í Finnlandi. Upplýsingar um það að ráða sig í vinnu eru á síðunni Réttindi og skyldur vinnandi fólks í Finnlandi.

Þú getur skráð þig í atvinnuleit á þjónustuvef TE-þjónustunnar. Ef þú átt ekkert rafrænt auðkenni sem virkar í Finnlandi, eða ert ekki ríkisborgari ESB-/EES-lands eða Sviss, þá getur þú skráð þig í atvinnuleit á starfsstöð TE-skrifstofunnar eða hjá ráðgjafarþjónustu TE-þjónustunnar. Nánari upplýsingar eru á vefsvæði Vinnumarkaðstorgsins (Työmarkkinatori).

Á vefsvæði vinnumarkaðstorgsins finnur þú allar atvinnuauglýsingar sem skráðar hafa verið hjá TE-þjónustunni og upplýsingar um þjónustu við fólk í atvinnuleit, svo sem ráðgjöf og ýmiss konar þjálfun. Nánari upplýsingar eru á vefsvæði Vinnumarkaðstorgsins (Työmarkkinatori).

Mörg fyrirtæki og stofnanir auglýsa laus störf á eigin heimasíðum, gegnum tengslanet sín eða gegnum ráðningarfyrirtæki. Störf innan opinberrar stjórnsýslu eru auglýst á síðunni Valtiolle.fi.

Einnig getur komið sér vel fyrir þig að nýta þitt eigið tengslanet í atvinnuleitinni. Mörg ný störf eru þess eðlis að ráðið er í þau án opinberra auglýsinga.

EURES (European Employment Services) er atvinnumiðlun Framkvæmdastjórnar Evrópusambandsins, en auk ESB-landa tekur hún til Noregs, Íslands, Liechtenstein og Sviss. Á vefsvæði EURES  er hægt að skoða auglýsingar um lausar stöður frá vinnumálastofnunum aðildarlandanna. Nánari upplýsingar eru á vefsvæði Kela.

Þar eru einnig tengiliðaupplýsingar EURES-ráðgjafa í hinum ýmsu löndum. EURES-ráðgjafi í þinni heimabyggð getur aðstoðað þig varðandi málefni sem tengjast því að starfa í Finnlandi.  Nánari upplýsingar eru á vefsvæði EURES.

Einnig er að finna gagnlegar ábendingar hér fyrir neðan undir fyrirsögninni Atvinnuleit í Finnlandi. Fyrirtæki auglýsa stöður á sænsku og ensku ef færni í þessum tungumálum er krafist til að gegna viðkomandi starfi.

Atvinnulaust fólk frá aðildarlöndum ESB og EES heldur atvinnuleysisbótum frá brottfararlandi sínu í lengsta lagi í þrjá mánuði eftir að komið er til Finnlands í atvinnuleit. Til að fá atvinnuleysisbætur áfram greiddar þarf að fylla út eyðublað PD U2 eða E303 í brottfararlandinu og skrá sig í atvinnuleit hjá TE-þjónustunni.

Áður en þú heldur til annars lands í atvinnuleit skaltu hafa samband með góðum fyrirvara við þá stofnun sem greiðir þér atvinnuleysisbætur og kynna þér skilyrði, tímamörk og mögulega bið eftir málsmeðferð. Þú finnur nánari upplýsingar á upplýsingasíðum brottfararlands þíns um atvinnuleysisbætur og á vefsvæði Vinnumarkaðstorgsins.

Fái fólk vinnu í Finnlandi fær það aðild að almannatryggingum þar á sömu kjörum og annað vinnandi fólk þar í landi. Meginreglan er að fólk hætti þá að borga í atvinnuleysissjóð þess lands sem áður var starfað í og byrji að greiða í samsvarandi sjóð í Finnlandi.

Fái einstaklingur í atvinnuleit ekki vinnu í Finnlandi innan þriggja mánaða frá komunni þangað, og vilji hann ekki tapa rétti sínum til atvinnuleysisbóta, þarf hann að snúa aftur til heimalandsins.