Skráning í þjóðskrá í Finnlandi

Þjóðskrá eða mannfjöldaupplýsingakerfi Finnlands er landsbundinn rafrænn gagnagrunnur þar sem finna má uppfærðar upplýsingar um finnska ríkisborgara og fólk frá öðrum löndum sem er búsett í Finnlandi til lengri eða skemmri tíma. Upplýsingar gagnagrunnsins eru notaðar við upplýsingastjórnun á ýmsum sviðum samfélagsins, til dæmis í opinberri stjórnsýslu, við undirbúning kosninga, við skattlagningu og í dómstólasýslu, auk rannsókna og samantektar á hagtölum. Nánari upplýsingar um þjóðskrána eru á vefsvæði finnsku stofnunarinnar um stafræna væðingu og lýðfræðigögn (Digi- ja väestötietovirasto), sem hefur umsjón með þjóðskránni.

Ef þú uppfyllir tiltekin skilyrði er hægt að vista upplýsingar um þig í þjóðskrá Finnlands og þá færð þú finnska kennitölu og ert skráð/ur til búsetu í tilteknu sveitarfélagi. Í vissum tilvikum getur þú fengið kennitölu þó að búseta þín í Finnlandi teljist ekki varanleg. Nánari upplýsingar um finnska kennitölu eru á síðunni Finnsk kennitala.

Athugaðu að úrskurður frá stofnuninni um stafræna væðingu og lýðfræðigögn veitir þér ekki sjálfkrafa rétt til að eiga aðild að finnskum almannatryggingum og fá bætur frá almannatryggingastofnuninni Kela. Réttur til almannatrygginga og bóta í Finnlandi er ákvarðaður á grundvelli þar til gerðra umsókna. Nánari upplýsingar eru á vefsvæði Kela.

Athugaðu einnig að þó að þú tilkynnir stofnuninni um stafræna væðingu og lýðfræðigögn um nýtt heimilisfang þitt, þá er ekki víst að upplýsingarnar berist öllum stofnunum sem kunna að senda þér póst. Ef þú vilt tryggja að allur póstur berist þér á nýtt heimilisfang skaltu tilkynna breytinguna öllum þeim stofnunum sem senda þér reglulega póst.

Þær leiðbeiningar sem eiga við um þitt tilfelli eru mismunandi eftir því frá hvaða landi þú flytur til Finnlands og hversu lengi þú ætlar að búa í Finnlandi. Veldu það sem passar við þínar aðstæður úr fellilistanum hér fyrir neðan. 

Ef þú ert undir lögaldri og flytur til Finnlands eiga sömu reglur við um þig og um fullorðna. Sért þú undir 15 ára aldri á DVV ávallt að ræða við forsjáraðila þinn eða forsvarsaðila. Þess vegna ættir þú að hafa meðferðis skriflega greinargerð, undirritaða af forsjáraðilum, þar sem fram kemur að þú sért að flytja til Finnlands.

Kynntu þér upplýsingar á síðum DVV um skráningu erlendra borgara í þjóðskrá Finnlands. 

Öll sem skráð eru með fasta búsetu í Finnlandi eiga þar sitt búsetusveitarfélag. Skattlagning einstaklinga, framboð á heilbrigðisþjónustu og fleira ræðst meðal annars af búsetusveitarfélagi. Nánari upplýsingar eru á vefsvæði finnsku stofnunarinnar um stafræna væðingu og lýðfræðigögn.

Uppýsingar fyrir fólk sem flytur til Álandseyja um svonefndan heimabyggðarrétt og um undanþágu frá herþjónustu eru á síðunni Skráning í þjóðskrá á Álandseyjum.

Samkvæmt Norðurlandasamningnum um almannaskráningu getur hver íbúi á Norðurlöndum aðeins verið skráður í þjóðskrá eins norræns lands í einu. Ef þú býrð eða ert skráð/ur til heimilis í tveimur norrænum ríkjum samtímis, þá ákveður viðeigandi yfirvald í landinu sem flutt er til hvort beri að skrá búsetu þína í því landi eða ekki.

Almenna reglan er sú að það land sem viðkomandi einstaklingur hefur sterk tengsl til, svo sem vegna fjölskyldu, fasteigna eða vinnustaðar, telst vera búsetuland hans. Skráningaryfirvöld landsins sem flutt er til taka ákvörðun um búsetu einstaklings þegar hann hefur mætt á þarlenda skráningarskrifstofu og skráð sig

Upplýsingar um almannatryggingar ef þú býrð í fleiri en einu landi samtímis eru á síðunni „Hvar átt þú aðild að almannatryggingum?“.

Það veltur á reglum þess lands sem flutt er frá hvort þú átt líka að tilkynna brottfararlandinu um flutning þinn til Finnlands. Í Svíþjóð og Danmörku á einnig að tilkynna þjóðskrá í brottfararlandinu um flutning til Finnlands. Nánari upplýsingar eru á síðunum hér fyrir neðan.

Þegar þú flytur innan Finnlands þarft þú alltaf að tilkynna það stofnuninni um stafræna væðingu og lýðfræðigögn. Nánari upplýsingar eru á vefsvæði stofnunarinnar um stafræna væðingu og lýðfræðigögn.

Þegar flutt er innan Finnlands er einnig mikilvægt að tilkynna það þjóðskrá í landinu sem flutt var frá, þar sem ekki er víst að upplýsingar um flutninginn berist sjálfkrafa til annarra landa. Þegar þú skráir nýtt heimilisfang þitt í Finnlandi skaltu gæta þess að þjóðskrá í fyrrum búsetulandi þínu fái einnig upplýsingar um nýja heimilisfangið. Nánari upplýsingar um reglur í mismunandi löndum eru á síðu fyrir viðkomandi land.

Ef þú flytur frá Finnlandi til annars norræns lands skaltu tilkynna flutninginn viðeigandi yfirvöldum í Finnlandi og í því landi sem þú flytur til. 

Í Finnlandi þarft þú að tilkynna flutning til stofnunarinnar um stafræna væðingu og lýðfræðigögn (DVV) og til Kela. Nánari upplýsingar eru á vefsvæðum DVV og Kela.

Viðeigandi yfirvöld í landinu sem þú flytur til ákveða hvernig flutningurinn verður skráður. Nánari upplýsingar eru á síðum um skráningu í þjóðskrá í mismunandi löndum.