Dvalar- og starfsleyfi í Finnlandi

Borgarar norrænna ríkja þurfa ekki dvalar- eða starfsleyfi til að dvelja eða starfa í öðru norrænu ríki. Ákveðin skilyrði gilda þó fyrir ríkisborgara ESB- eða EES-landa utan Norðurlanda og borgara annarra ríkja sem vilja dvelja eða starfa í Finnlandi. Á þessari síðu má finna upplýsingar um þau skilyrði. 

Borgarar norrænu landanna eiga rétt á að búa og starfa í öðrum norrænum löndum án dvalar- eða starfsleyfis. Ætlir þú að dvelja í Finnlandi í í hæsta lagi sex mánuði þarft þú ekki að tilkynna finnskum yfirvöldum um dvölina. Ætlir þú að dvelja lengur en sex mánuði í Finnlandi þarft þú að fara í eigin persónu á þjónustustöð stofnunarinnar um stafræna væðingu og lýðfræðigögn (Digi- ja väestötietovirasto). Nánari upplýsingar eru á vefsvæði finnsku stofnunarinnar um stafræna væðingu og lýðfræðigögn. 

Nánari upplýsingar um þjóðskrá í Finnlandi finnur þú á síðunni Að tilkynna flutning og skrá sig í þjóðskrá í Finnlandi. 

Ef þú ert borgari norræns ríkis og flytur til Finnlands ásamt fjölskyldumeðlim sem ekki er borgari norræns ríkis, þá finnur þú leiðbeiningar um slík tilvik neðar á þessari síðu. 

Borgarar annarra ESB-landa, auk Sviss og Liechtenstein, þurfa ekki dvalar- eða starfsleyfi í Finnlandi en þurfa þó að skrá sig inn í landið ef dvöl varir lengur en í þrjá mánuði. Mælt er með því að skrá sig á EnterFinland, þjónustuvef Finnsku stofnunarinnar um málefni innflytjenda. Nánari upplýsingar eru á vefsvæði Finnsku stofnunarinnar um málefni innflytjenda (Maahanmuuttovirasto). 

Fjölskyldumeðlimir ríkisborgara ESB-ríkja, Sviss eða Liechtenstein sem ekki eru sjálfir borgarar ESB-ríkis þurfa að sækja um sérstakt dvalarleyfiskort fyrir fjölskyldumeðlimi ESB-borgara hjá EnterFinland, þjónustuvef Finnsku stofnunarinnar um málefni innflytjenda. Börn undir lögaldri þurfa einnig að sækja um dvalarleyfi ætlað fjölskyldumeðlimum. Nánari upplýsingar eru á vefsvæði Finnsku stofnunarinnar um málefni innflytjenda (Maahanmuuttovirasto). 

Ef þú ert ríkisborgari annars lands en þeirra sem nefnd eru að ofan og vilt flytja til Finnlands eða starfa þar, þá þarftu að sækja um dvalarleyfi. 

Ef þú ert fjölskyldumeðlimur ríkisborgara í ESB-landi og vilt flytja með honum til Finnlands, þá þarftu að sækja um dvalarleyfiskort fyrir fjölskyldumeðlim ríkisborgara ESB-lands.  

Dvalarleyfi í Finnlandi

Hægt er að veita dvalarleyfi í Finnlandi á margvíslegnum forsendum en þær algengustu eru atvinna, nám og fjölskyldutengsl. Í flestum tilvikum er starfsleyfi innifalið í dvalarleyfinu.  

Dvalarleyfi gildir aðeins í landinu sem það er veitt í. Þú getur því ekki notað dvalarleyfi sem veitt er í Finnlandi til þess að starfa í öðru norrænu landi. 

Almennt skal sækja um fyrsta dvalarleyfi áður en komið er til Finnlands. Þá þarft þú að fara í sendiráð eða sendiskrifstofu Finnlands og framvísa gildum persónuskilríkjum. Í vissum aðstæðum er einnig hægt að sækja um dvalarleyfi eftir komuna til Finnlands. Nánari upplýsingar um dvalarleyfi eru á vefsvæði finnsku stofnunarinnar um málefni innflytjenda (Maahanmuuttovirasto)).

Á vefsvæði finnska utanríkisráðuneytisins má finna upplýsingar um sendiráð og sendiskrifstofur Finnlands í öðrum löndum.  

Dvalarleyfiskort fyrir fjölskyldumeðlimi ríkisborgara ESB-landa í Finnlandi

Þú getur sótt um dvalarleyfiskort fyrir fjölskyldumeðlimi ríkisborgara ESB-landa ef þú ert sjálf/t/ur ekki ríkisborgari ESB-lands, en ert fjölskyldumeðlimur ríkisborgara ESB- eða EES-lands, Íslands, Noregs, Liechtenstein eða Sviss. Til að sækja um þarftu að hafa gilt vegabréf. Fjölskyldumeðlimur þinn sem er ríkisborgari ESB-lands þarf einnig að búa í Finnlandi.   

Þú getur sótt um dvalarleyfiskort fyrir fjölskyldumeðlimi ríkisborgara ESB-landa með því að fylla út rafræna umsókn á þjónustuvefnum EnterFinland og með því að gera grein fyrir þér á skrifstofu stofnunarinnar um málefni innflytjenda. Þú getur líka sótt um dvalarleyfiskort með því að fylla út umsóknareyðublað á pappír, en þá þarftu að skila eyðublaðinu í eigin persónu á þjónustustöð Finnsku stofnunarinnar um málefni innflytjenda.  

Ef þú ert fjölskyldumeðlimur ríkisborgara ESB-lands, og fjölskyldumeðlimurinn býr í Finnlandi, þá máttu byrja að vinna um leið og þú kemur til Finnlands.  

Nánari upplýsingar eru á vefsvæði Finnsku stofnunarinnar um málefni innflytjenda (Maahanmuuttovirasto). 

Að ferðast utan Finnlands 

Ef þú hefur fengið dvalarleyfi eða dvalarleyfiskort fyrir fjölskyldumeðlimi ríkisborgara ESB-landa í Finnlandi, þá þarftu ekki vegabréfsáritun til að ferðast á Schengen-svæðinu í að hámarki 90 daga á 180 daga tímabili.  

Dvalarleyfi í Finnlandi veitir aðeins rétt til að ferðast án vegabréfsáritunar til landa innan Schengen-svæðisins. Ferðist þú til annarra landa gætirðu þurft að fá vegabréfsáritun. Nánari upplýsingar eru á vefsvæði Finnsku stofnunarinnar um málefni innflytjenda (Maahanmuuttovirasto).