Leiðbeiningar: Flutt frá Danmörku

Þér ber skylda til þess að láta dönsku þjóðskrána vita af því ef þú hyggst dveljast erlendis í meira en sex mánuði.

Þegar þú flytur frá Danmörku til Finnlands, Færeyja, Íslands, Noregs eða Svíþjóðar þarftu að tilkynna flutninginn á skráningarskrifstofu í sveitarfélaginu sem þú flytur frá. Einnig þarftu að tilkynna um flutninginn í landinu sem þú flyst til. Þú verður skráð(ur) sem brottflutt(ur) frá Danmörku þegar þú hefur verið skráð(ur) í þjóðskrá í norræna landinu sem þú flytur til.

Athugaðu að danska þjóðskráin fær ekki sjálfkrafa tilkynningu um það ef þú flytur til nýs heimilisfangs erlendis. Þú þarft að tilkynna þjóðskrá það.

Þú þarft að upplýsa skattyfirvöld (Skattestyrelsen) um flutning þinn úr landi.

Ef þú færð greiðslur frá hinu opinbera þarftu að kanna hvort þú getir fengið þær áfram erlendis. Þú þarft því að hafa samband við sveitarfélagið þitt eða Udbetaling Danmark áður en þú flytur.

Þú þarft að láta danska atvinnuleysistryggingasjóðinn þinn vita af flutningunum. Ef þú hyggst vinna áfram í Danmörku, eða ef þú ert útsendur starfsmaður, kann að vera að þú njótir enn almannatrygginga í Danmörku og eigir því áfram að vera aðili að dönskum atvinnuleysistryggingasjóð til að eiga rétt á atvinnuleysisbótum.

Ef þú flytur til Íslands eða Noregs og nýtur þar almannatrygginga nýturðu sjálfkrafa opinberra atvinnuleysistrygginga og þarft ekki að skrá þig í sjóð.

Í Finnlandi og Svíþjóð er opinber grunntrygging og viðbótartrygging sem krefst aðildar að atvinnuleysistryggingasjóði. Viljir þú vera aðili að atvinnuleysistryggingasjóði er mikilvægt að þú skráir þig fljótt til þess að geta lagt saman tryggingatímabil á milli Danmerkur og Finnlands eða Svíþjóðar.

Ef þú þiggur danska dagpeninga kanntu undir ákveðnum kringumstæðum að fá dönsku dagpeningana greidda í þrjá mánuði á meðan þú leitar að starfi í öðru ESB- eða EES-landi.

Þú þarft að tilkynna Postnord um flutningana svo hægt sé að áframsenda póstinn þinn á nýja heimilisfangið.

Þú þarft að láta ýmis einkafyrirtæki vita af flutningunum:

• banka

• tryggingafélag

• lífeyrissjóð

Einnig þarftu að hafa samband við samtök sem þú ert aðili að, sem og dagblöð og tímarit sem þú ert áskrifandi að.

Ef þú ert danskur ríkisborgari geturðu skráð þig á lista utanríkisráðuneytisins yfir Dani. Listinn auðveldar ráðuneytinu að senda mikilvægar upplýsingar um krísur á borð við náttúruhamfarir, pólitíska ólgu eða hryðjuverk. Skráning á listann er valfrjáls en bæði þeim sem ferðast og flytjast til útlanda er ráðlagt að skrá sig.

Almenna reglan er sú að þú berir fulla skattskyldu í landinu sem þú býrð í. Ef þú vinnur í öðru landi er almenna reglan sú að þú berir takmarkaða skattskyldu þar.

Þú getur nálgast frekari upplýsingar um skattareglur á Norðurlöndum á Nordisk eTax-vefgáttinni sem rekin er í samstarfi norrænna skattyfirvalda.

Meginreglan er sú að einstaklingur er tryggður af almannatryggingum í því landi sem hann býr og starfar í. Ef þú hefur ekki vinnu, eða ef þú vinnur í einu landi en starfar í öðru, eða ef þú ert útsendur starfsmaður, gilda sérstakar reglur.

Það hvar þú nýtur almannatrygginga skiptir máli varðandi reglur um atvinnuleysistryggingar, lífeyrisgreiðslur, fjölskyldubætur og fleira, sem og hvar vinnuveitandinn á að greiða félagsleg gjöld.

Þú missir ekki danskan ríkisborgararétt þegar þú flytur til útlanda og ekki heldur þótt þú öðlist ríkisborgararétt í öðru norrænu landi. Þú getur endurnýjað vegabréfið hjá dönsku sendiráði eða ræðisskrifstofu í öðru norrænu landi. Einnig geturðu gert það hjá borgaraþjónustu í Danmörku eða lögreglunni í Færeyjum eða á Grænlandi.

Þú heldur dönsku kennitölunni þinni (CPR-nummer) út ævina. 

Ef flutt er úr landi og viðkomandi er skráður sem brottfluttur í dönsku þjóðskránni (CPR), er alla jafna ekki hægt að kjósa við danskar þingkosningar og þjóðaratkvæðagreiðslur, ekki heldur þótt viðkomandi sé danskur ríkisborgari. Vissir þjóðfélagshópar geta þó komist á kjörskrá, sæki þeir um það, og þar með kosið í slíkum kosningum þrátt fyrir að búa í útlöndum.

Ef þú býrð í öðru norrænu hefurðu ekki atkvæðisrétt í sveitar- og héraðsstjórnarkosningum í Danmörku. Á hinn bóginn getur þú tekið þátt í kosningum þar sem þú býrð ef þú ert ríkisborgari í öðru norrænu landi eða ESB- eða EES-landi.

Þú getur haldið MitID-skilríkjum þínum þegar þú flyst til útlanda.

Danskt ökuskírteini gildir alls staðar á Norðurlöndum. Ef þú flytur til annars lands gæti borgað sig að fá sér nýtt ökuskírteini í því landi. Með því móti er auðveldara að fá nýtt ef þú skyldir missa ökuskírteinið.Þú verður alltaf að skipta danska ökuskírteininu þínu út áður en það rennur út.

Ef þú flytur til Færeyja, Grænlands, Íslands, Noregs eða Álandseyja þarftu að kanna hvaða tollareglur gilda.

Alla jafna þarftu að útbúa yfirlýsingu um flutning. Til þess er notað sérstakt eyðublað, „enhedsdokument“. Mælt er með því að flutningsfyrirtækið sjái um þetta.

Ef þú átt bíl þarf að afskrá hann í Danmörku. Oft er hægt að fá hluta af danska skráningargjaldinu endurgreitt. 

Ef þú ætlar að flytja með þér gæludýr þarftu að kynna þér reglur hvað það varðar í landinu sem þú flytur til. Oftast er gerð krafa um vegabréf fyrir gæludýrið auk bólusetninga. Athugaðu líka að sum dýr eða dýrakyn eru ólögleg í sumum löndum.

Ef þú ert þunguð og gerir ráð fyrir að eiga barnið í landinu sem þú flyst til þarftu að hafa samband við heilbrigðisyfirvöld þar til að fá upplýsingar um hvaða gögn þú þarft að hafa meðferðis frá Danmörku.

Einnig skaltu kynna þér reglur um fæðingarorlof. Alla jafna áttu ekki rétt á fæðingarorlofsgreiðslum í landi sem þú hefur ekki unnið í en ef orlofið hefst í Danmörku, áður en þú flytur, er almenna reglan sú að þú eigir rétt á fæðingarorlofsgreiðslum frá Danmörku, einnig eftir flutninginn, að því gefnu að orlofið sé órofið.

Ef þú ert með langvarandi sjúkdóm sem krefst lyfjameðhöndlunar eða reglulegs eftirlits þarftu að ræða við lækninn þinn til að tryggja að þú hafir næg lyf og nauðsynleg gögn um sjúkdóminn og meðferðina. Einnig skaltu hafa samband við heilbrigðiskerfið í nýja landinu til að tryggja að þér verði vísað til rétts meðferðaraðila.

Gott getur verið að taka saman mikilvægar upplýsingar og gögn sem nota má í samskiptum við yfirvöld og atvinnurekendur.

Það getur meðal annars verið:

• kennitala

• skírnarvottorð

• hjúskaparvottorð

• ráðningarsamningar

• launaseðlar

• skattframtöl

• upplýsingar um lífeyrissparnað og bankareikninga

• einkunnir

• leyfisbréf