Listakonan Jessie Kleeman í Norræna skálanum á loftslagsráðstefnu Sameinuðu þjóðanna, COP28
Norrænt samstarf setur listir og menningu á dagskrá á loftslagsráðstefnu Sameinuðu þjóðanna, COP28, sem hefst í Dubai á fimmtudaginn.
„Það gleður okkur að Jessie Kleeman skuli sýna verk sitt og miðla reynslu um það hvers vegna listir gegna lykilhlutverki í grænum umskiptum í dagskrá Norðurlandanna á loftslagsráðstefnunni. Það er löngu tímabært að við beinum kastljósinu að listafólki sem með ólíkum hætti getur í verkum sínum stuðlað að skilningi og aukið meðvitund um þær gríðarlegu breytingar sem við stöndum frammi fyrir, bæði á Norðurlöndum og annars staðar,“ segir Karen Ellemann, framkvæmdastjóri Norrænu ráðherranefndarinnar.
Ísinn bráðnar – „Arkhticós Dolorôs“ (Arctic Pain)
Myndlistarkonan og ljóðskáldið Jessie Kleemann hefur sett mark sitt á samtímalist á Norðurlöndum og alþjóðlega. Hún vinnur vídeóverk, gjörningalist og tilraunaleikhús og skrifar einnig bækur og gerir innsetningar. Vídeóverk Jessie Kleemann „Arkhticós Dolorôs“ (Arctic Pain) verður sýnt daglega fyrstu viku loftslagsráðstefnunnar. Gjörningurinn í verkinu var tekinn upp í nágrenni Ilulissat á Grænlandi.
„Arkhticós Dolorôs þýðir að við séum öll í þessu, þetta er þjáning mín, þetta er þjáning norðurskautsins, við erum þjáningin, hinn stórkostlegi hvítabjörn þjáist einmitt nú,” segir Jessie Kleemann um verkið.
Jessie sem er frá Upernavík á Grænlandi býr og starfar í Kaupmannahöfn. Einkasýningu hennar, Running Time, lauk nýverið á Statens Museum for Kunst en sýningin hlaut mikið lof gagnrýnenda. Auk þess stendur yfir sýning í Kunsthal Rønnebæksholm þar sem sjónum er beint að ljóðlist hennar og málverkum.
Pallborðsumræður: No transformation without imagination
Jessie Kleemann tekur einnig þátt í pallborðsumræðum sem haldnar verða í Norræna skálanum 6. desember um þátt listar og menningar í grænum umskiptum. Í umræðunum verður lagt út frá mætti listarinnar til að skapa meðvitund og skilning um breytta lífshætti, hegðun og þátttöku.
Aðrir þátttakendur í pallborðsumræðunum eru: Solveig Korum, Menningarmálastofnun Noregs, Louise Lindén, LiveGreen, Gunn-Britt Retter, Samaráðinu, Rodion Sulyandziga, IWGIA.
Viðburðurinn verður í beinu streymi þannig að fólk getur tekið þátt þó að það sé ekki í Dubai.
Viðburður: No transformation without imagination
The power of art and culture for the green transition
6. Desember, 18.15 til 19.00 (UTC+4)
Það gleður okkur að Jessie Kleeman skuli sýna verk sitt og miðla reynslu um það hvers vegna listir gegna lykilhlutverki í grænum umskiptum í dagskrá Norðurlandanna á loftslagsráðstefnunni.
