Øyvind Torvund

Øyvind Torvund (f. 1976) sine komposisjonar kombinerer ofte konvensjonelt strukturert og notert samtidsmusikk med element henta frå andre stilartar som rock og underhaldningsmusikk. Eller som i Willibald Motor Landscape, der han trekker inn element frå lydverda i elektroniske spel og norsk folkemusikk.

The Exotica Album vart urframført av det akustisk baserte samtidsensembelet BIT20 i møte med improvisatorane Jørgen Træen på modular synth og jazzsaxofonisten Kjetil Møster.

Mange vestlege komponistar har vore inspirerte av «eksotisk» musikk – både romantikarar, impresjonistar og modernistar. Men den formen for eksotika Torvund spelar på her, er ei grein av underhaldningsmusikken som vart populær i USA på 50- og 60-talet, der strykeorkester/storband vart kombinert med «eksotiske» instrument frå stillehavsområdet og Orienten. I tillegg førekom imitasjonar av naturlydar (særleg fuglesong) som skulle skapa ein illusjon av jungel og tropelandskap. På 90-talet vart stilen revitalisert som ein del av fenomenet «loungemusikk».

Men Torvund nøyer seg ikkje med å resirkulera ein allereie resirkulert eksotisme. Han inkluderer også element som illuderer den tidlege elektroniske musikken (t.d. Stockhausen). Satsane er stramt strukturerte, og dei musikalske ideane står tydeleg fram utan å verta tværa ut.

Torvund har atter vist at han er ein av våre mest særprega samtidskomponistar.

Lenke