Sérfræðingar í málefnum farandfólks með nýjar tillögur til norrænna ráðherra aðlögunarmála

Undanfarið ár hafa sérfræðingar í norrænni nefnd um málefni farandfólks leitast við að svara spurningunni: Hvað felst í góðri aðlögun? Afraksturinn er 13 tillögur sem lagðar voru fyrir norræna ráðherra í aðlögunarmálum á fundi þeirra í Reykjavík í þeim tilgangi að veita ráðherrunum innblástur við áframhaldandi pólitískt starf.

Takura Matswetu, formaður nefndarinnar, tók sjálfur þátt í fundinum og skilaboðin frá honum voru eftirfarandi: Mælanlegar aðgerðir í aðlögunarmálum eru leiðin til árangurs. Takura mæltist jafnframt til þess að norrænu ráðherrarnir kæmu sér saman um skilgreiningu á sameiginlegri og mælanlegri norrænni nálgun á aðlögunarmál. Skilgreiningin þarf að vera víðtæk og ná til nokkurra sviða, svo sem menntunar, aðlögunar á vinnumarkaði og tungumálanáms. Markmiðið á að vera að skapa samfélagslega samstöðu sem byggist á réttlæti.

Nefndin er skipuð fulltrúum frá öllum norrænu löndunum auk sjálfsstjórnarsvæðanna. Allir nefndarmenn eru af erlendu bergi brotnir en það gefur tillögum þeirra aukið vægi þar sem þeir geta byggt þær á eigin reynslu af því að hafa fæðst í löndum utan Norðurlanda og flutt svo hingað. Þeir eru jafnframt sérfræðingar á sviði aðlögunarmála, m.a. með sérþekkingu á sviði menntamála, vinnumarkaðarins, jafnréttis og félags- og heilbrigðismála. 

Norræna ráðherranefndin stofnaði sérfræðinefndina með það fyrir augum að ráðherrar aðlögunarmála geti mótað sem besta stefnu í aðlögunarmálum innan hvers lands og á Norðurlöndum í heild sinni og þannig stuðlað að uppfyllingu framtíðarsýnar Norrænu ráðherranefndarinnar um að Norðurlönd verði félagslega sjálfbærasta svæði heims árið 2030.