Norðurlönd staðfesta öflugar skuldbindingar í loftslagsmálum
Í Óslóaryfirlýsingunni er tekið fram að loftslagsbreytingarnar eru eitt stærsta viðfangsefni mannkyns og því eru ráðherrarnir eindregið fylgjandi löggjöf sem byggir á loftslagsvísindum og staðreyndum.
„Það er afar mikilvægt að Norðurlönd stígi fram og taki skýra forystu í loftslagsmálum. Mikil þörf er á því að lönd sýni fram á hinn gríðarlega ávinning sem felst í umskiptum til vistvænna samfélags. Framkvæmd Parísarsamkomulagsins er ekki aðeins lykilatriði fyrir komandi kynslóðir, heldur einnig efnahagslega hagkvæm,“ segir Isabella Lövin, ráðherra alþjóðlegrar þróunarsamvinnu og loftslagsmála í Svíþjóð.
Í yfirlýsingunni kveðast umhverfis- og loftslagsmálaráðherrarnir staðráðnir í því að aðildarríki Parísarsamkomulagsins starfi áfram að skilvirkri og samfelldri framkvæmd þess. Stefnt verði að samráði á árinu 2018 þar sem allir aðilar íhugi að auka metnað sinn fyrir árið 2020 í ljósi niðurstaða rannsókna. Kolefnisgjöld og niðurfelling á niðurgreiðslum til jarðefniseldsneytis eru nefnd sem mikilvæg tæki.
Bráðnun norðurskautsins hefur áhrif um allan heim
Í Óslóaryfirlýsingunni lýsa ráðherrarnir yfir þungum áhyggjum af þeirri staðreynd að hlýnun andrúmsloftsins á norðurslóðum er meira en tvöfalt hraðari en annars staðar í heiminum. Minnkun ísbreiðunnar raskar orkujafnvæginu í heiminum og hefur áhrif á loftslag um allan heim.
„Vandinn sem skapast á norðurslóðum er engan veginn staðbundinn. Þegar sífreri bráðnar losnar metangas úr læðingi og hraðar enn frekar hlýnun andrúmsloftsins. Þegar ísbreiður bráðna og yfirborð sjávar hækkar, ógnar það samfélögum og þéttbýli á láglendum svæðum um allan heim,“ segir Vidar Helgesen, loftslags- og umhverfismálaráðherra Noregs og formaður Norrænu ráðherranefndarinnar um umhverfismál á árinu 2017.
