Umræður um varnarmál og heimsókn til forseta Finnlands er forsætisnefnd Norðurlandaráðs fundaði í Finnlandi
Öryggismál æ mikilvægari fyrir Norðurlandaráð
Öryggis- og varnarmál hafa mikið verið rædd innan ramma Norðurlandaráðs eftir innrás Rússlands í Úkraínu. Á fundi forsætisnefndar í Finnlandi voru rædd tilmæli bæði um enduruppbyggingu Úkraínu og um norrænt öryggi og varnir í því nýja landfræðipólitíska samhengi sem Norðurlönd eru nú hluti af. Norðurlandaráð telur að vinna þurfi skýrslu um heildarvarnir fyrir Norðurlönd til að fá mynd af því hvernig varnarmálasamstarfið getur þróast í framtíðinni. Einnig var fjallað um tillögu um aukna sjálfbærni að því er varðar bæði orkuframleiðslu og matvælaframleiðslu.
Forsætisnefnd Norðurlandaráðs vinnur einnig að tillögum um endurskoðun Helsingforssamningsins, sem kveður á um hvernig haga beri hinu opinbera norræna samstarfi. Möguleg endurskoðun hans gæti náð til öryggis- og varnarmála.
Heimsókn til forseta Finnlands
Í tengslum við fundinn var forsætisnefnd einnig boðið á fund með forseta Finnlands Sauli Niinistö, þar sem rætt var um utanríkis-, öryggis- og varnarmál með sérstakri áherslu á norrænt samstarf.
„Við áttum góðar umræður við forsætisnefnd Norðurlandaráðs um utanríkis-, öryggis- og varnarmál. Saman erum við sterk þegar kemur að því að skapa öryggi,“ sagði forseti Finnlands, Sauli Niinistö.
Allir fulltrúar forsætisnefndar Norðurlandaráðs sátu fundinnm sem var haldinn í aðsetri finnska forsetans, Mäntyniemi.
„Í ljósi stöðu mála í heiminum í dag er mjög mikilvægt að norrænu löndin vinni einnig saman á sviði varnarmála. Saman getum við verið afl í þágu stöðugleika og friðar. Þema formennskuáætlunar Íslands í Norðurlandaráði 2024 er „Friður og öryggi á Norðurslóðum“ og því verður þetta þema einnig ofarlega á dagskrá í framtíðinni,“ sagði Helge Orten, varaforseti Norðurlandaráðs.
Samstarf við Eystrasaltsríkin
Forsætisnefnd lagði einnig fram nýja tillögu um að norrænu ríkisstjórnirnar auki samstarf sitt við ríkisstjórnir Eystrasaltsríkjanna til að efla hagkerfi, frelsi og sjálfsákvörðunarrétt á báðum svæðunum. Eystrasaltsríkin og Eystrasaltsþingið eru nú þegar samstarfsaðilar sem eru í miklum forgangi hjá Norðurlandaráði.
Vindorka á hafi
Forsætisnefnd Norðurlandaráðs samþykkti fyrir hönd þingfundar tilmæli um fjárfestingu í vindorku á hafi. Norðurlandaráð vill einfalda opinber ferli fyrir vindorkuver á hafi á Norðurlöndum, að samstarf verði um rannsóknir og menntun í tengslum við tæknina og að norrænu raforkufyrirtækin vinni saman að enn samþættara norrænu rafmagnsdreifikerfi.