Samstarf Norðurlanda og Eystrasaltsríkjanna um rafræna auðkenningu stuðlar að einfaldari þjónustu þvert á landamæri

Skýrslan er afrakstur viðamikillar greiningarvinnu og samstarfs sérfræðinga frá norrænu og baltnesku löndunum og varpar ljósi á stöðu rafrænnar auðkenningar og sannvottun kennsla (e. identity matching) þvert á landamæri. Greindar hafa verið sameiginlegar áskoranir og lausnir sem styrkt geta svæðið í sessi sem leiðandi á hinu stafræna sviði.

Ein helsta niðurstaða skýrslunnar er að þörf sé á betri sannvottun kennsla til þess að mæta áskorunum varðandi rafræna auðkenningu þvert á landamæri. Þetta felur meðal annars í sér skipti á rafrænum lyfseðlum og viðurkenningu á starfsréttindum en hvort tveggja er nauðsynlegur þáttur í hreyfanleika vinnumarkaðarins og opinberrar þjónustu.

„Sannvottun kennsla skiptir sköpum þegar kemur að skilvirkri notkun rafrænna skilríkja þvert á landamæri og til þess að greiða fyrir hreyfanleika yfir landamæri Norðurlanda og Eystrasaltsríkjanna. Þessi skýrsla felur í sér greiningu á núverandi lausnum á svæðinu og bendir á tækifæri til frekari stafrænnar samþættingar Norðurlanda og Eystrasaltsríkjanna,“ segir Dan Koivulaakso, deildarstjóri yfir deild hagvaxtar og loftslagsmála hjá Norrænu ráðherranefndinni.

Í skýrslunni er jafnframt lögð áhersla á mikilvægi þess að uppfæra og samræma eIDAS-reglugerðina sem fjallar um rafræna auðkenningu og traustþjónustu fyrir rafræn viðskipti á innri markaði ESB. Endurnýjuð reglugerð getur aukið traust og notkun rafrænnar auðkenningar þvert á landamæri.

Í tengslum við þessa vinnu hefur NOBID sett á fót starfshóp sem beinir sjónum sínum að sannvottun kennsla. Hópurinn er skipaður sérfræðingum frá stofnunum og ráðuneytum sem málið varðar á Norðurlöndum og í Eystrasaltsríkjunum. Markmiðið er að skiptast á reynslu, koma á verklagi og afla sameiginlegs skilnings á þeim áskorunum sem svæðið stendur frammi fyrir.

Niðurstöðum skýrslunnar er ætlað að mynda þekkingargrunn sem legið geti til grundvallar og hliðsjónar við frekari vinnu í tengslum við rafræna auðkenningu á svæðinu. Með stuðningi frá ráðgjafafyrirtækjunum Civitta og SK ID Solutions, og þökk sé framlagi frá sérfræðingum á svæðinu, hyggst NOBID áfram vinna að samþættri og sjálfbærri framtíð fyrir íbúa Norðurlanda og Eystrasaltsríkjanna.