Ungt fólk setur dagskrá Norðurlanda á COP27
„Norræn og alþjóðleg skilaboð ungs fólks eru skýr: Ungt fólk vill kerfisbreytingu og löggjöf um vistmorð. Það vill að Norðurlandabúar taki ábyrgð á því að tryggja okkar kynslóð betri framtíð," segir Amanda Björksell sem er fulltrúi sænskra ungmenna á loftslagsráðstefnu SÞ.
Hún og fleiri ungmenni frá Norðurlöndum og Suður-Ameríku munu skora á Norðurlönd að viðurkenna alþjóðlega umhverfisglæpi og tala fyrir löggjöf um vistmorð á umræðufundi 8. nóvember.
Norræni skálinn býður upp á vettvang fyrir ungt fólk
Í norræna skálanum er boðið upp á vettvang fyrir ungt fólk frá Norðurlöndum og heiminum öllum til að endurhugsa loftslagsáskoranir heimafyrir og hnattrænt.
„Það skiptir okkur unga fólkið á Norðurlöndum miklu máli að vera til staðar á COP27 vegna þess að þar koma leiðtogar heimsins saman til að ræða hvernig við eigum að leysa loftslagsbreytingarnar,“ segir Nadia Gullestrup Christensen sem er fulltrúi danskra ungmenna á loftslagsráðstefnunni.
„Því miður ganga grænu umskiptin allt of hægt og þörf er á að við unga fólkið séum á staðnum og minnum leiðtoga heimsins skyldur þeirra til að grípa til aðgerða fyrir okkar kynslóð og kynslóðir framtíðar.“
„Gjalda fyrir að þátttaka sé táknræn“
Í norræna skálanum munu stórar norrænar ungmennahreyfingar og SÞ-ungmennafulltrúar norrænu landanna skora á valdhafa varðandi nokkur af áleitnustu málefnunum - allt frá kerfisbreytingu, loftslagsréttlæti og að tryggja líffræðilega fjölbreytni til þátttöku barna og ungmenna í ákvörðunarferlum og hlutverks og áhrifa loftslagsráðs ungs fólks:
„Börn og ungmenni eru sérstaklega viðkvæmur og mikilvægur hópur þegar kemur að ákvörðunum um loftslagsmál en þessi hópur á of fáa fulltrúa og þátttaka þeirra geldur oft fyrir að vera táknræn í stað þess að skoðanir þeirra séu teknar alvarlega,“ segir Matilde Angeltveit frá Landsrådet for Norges Barne- og Ungdomsorganisasjoner.
„Börn og ungmenni eru fulltrúar framtíðarinnar og eru mikilvægir aðilar að því að finna leiðina áfram að réttlátum grænum umskiptum.“
Missið ekki af viðburðunum sem unga fólkið stýrir í norræna skálanum!
Fylgist með umræðunum í streymi eða á staðnum!
Í norræna skálanum verður boðið til meira en 80 viðburða á loftslagsráðstefnunni í ár.
Norðurlöndin hafa síðan 2015 tekið sameiginlega þátt í að skapa umræður og miðla þekkingu á árlegri loftslagsráðstefnu SÞ.
Hægt er að fylgjast með umræðunum í streymi eða á staðnum í norræna skálanum.