Vefþing: Nýjustu breytingar á norrænum næringarráðleggingum

Norrænar næringarráðleggingar eru gott dæmi um svæðisbundið samstarf um viðmið fyrir ráðleggingar um mataræði og næringarinntöku. NNR mynda fræðilegan grunn fyrir innlend viðmið um næringargildi og mataræði í Danmörku, Finnlandi, Íslandi, Noregi og Svíþjóð.

„Þetta er í fyrsta sinn sem loftslags- og umhverfismál eru hluti af innlendum viðmiðum. Áherslur verkefnisins eru á vísindaleg gæði, gagnsæi og lýðræðislega verkáætlun sem felur í sér nokkra opinbera samráðsfundi,“ segir prófessor Rune Blomhoff, sem fer fyrir vinnuhópnum sem ber ábyrgð á þróun ráðlegginganna.

Viltu vita meira um viðmiðin og verkfæri sem tengjast bæði næringu og umhverfislegri sjálfbærni? Taktu þátt í vefþingi um stöðu mála í boði NNR2022-nefndarinnar til að fá að vita meira um aðferðafræðina sem stuðst er við í verkefninu, helstu viðburði á næstu mánuðum og hvernig þú getur tekið þátt. Jafnframt verða kynntar upplýsingar um útgáfu hinnar endanlegu NNR2022-skýrslu. Einnig verður boðið upp á spurningar.

„Við viljum að fólk taki þátt, hvort sem það eru fræðimenn, hagsmunaaðilar sem starfa í tengdum iðnaði, fyrir stjórnvöld eða samtök, eða einfaldlega almenningur,“ segir prófessor Blomhoff.

• Hvenær: 25. maí, á milli kl. 8.00 og 9.30 að íslenskum tíma
• Hvar: Á netinu

Innan verkefnisins verða einnig haldnir opinberir samráðsfundir um vísindalegt bakgrunnsefni sem liggja mun til grundvallar fyrir leiðbeinandi viðmið um næringargildi (DRV) og mataræði (FBDG) í hinni endanlegu NNR2022-skýrslu.

NNR2022-nefndin hvetur hagsmunaaðila, vísindamenn og aðra áhugasama um að deila sýn sinni og athugasemdum um drög að köflum um vísindalegt mat á næringarefnum, fæðuflokkum og heilbrigðisþáttum. Fyrstu kaflarnir í NNR2022 eru nú aðgengilegir fyrir opinbert samráð. Samráðstímabilið fyrir hvern kafla verður átta vikur.

Samstarf sem stuðlar að betri samvinnu um næringu leikur lykilhlutverk í því að gera hollan mat aðgengilegan og eftirsóknarverðan. Frá því á níunda áratugnum hefur Norræna ráðherranefndin stutt við umfangsmikið svæðissamstarf um næringartengd málefni þar sem norrænu næringarráðleggingarnar hafa verið einn veigamesti þátturinn.

NNR2022-verkefnið er fjármagnað af Norrænu ráðherranefndinni og heilbrigðis- og matvælayfirvöldum á Norðurlöndum undir forystu norsku heilbrigðisstofnunarinnar. Yfir 400 vísindamenn koma að verkefninu sem er gríðarstórt og stendur í fjögur ár.