Atvinnu- og dvalarleyfi á Álandseyjum

.Á Álandseyjum gilda sömu reglur og í Finnlandi um umsókn um atvinnu- og dvalarleyfi. Ef þú ert ríkisborgari norræns lands þarftu hvorki að fá atvinnu- né dvalarleyfi. Ef þú hyggst dvelja lengur en í þrjá mánuði á Álandseyjum þarftu að tilkynna þig til skráningaryfirvalda á svæðisskrifstofu Álandseyja – nánari upplýsingar eru á síðunni „Skráning í þjóðskrá á Álandseyjum“. Ef þú velur eða vinnur eingöngu á Álandseyjum þarftu ekki að tilkynna um flutning til skráningaryfirvalda.

Ef þú ert ríkisborgari ESB- eða EES-ríkis utan Norðurlandanna eða lands utan ESB gilda ákveðnar reglur um atvinnu- og dvalarleyfi. Sænska innflytjendastofnunin (Migrationsverket) hefur umsjón með slíkum málum. Nánari upplýsingar um hvaða reglur gilda um atvinnu- og dvalarleyfi á Álandseyjum er að finna á síðunni „Atvinnu- og dvalarleyfi í Finnlandi“.

Á þjónustustað Migrationsverket getur þú framvísað skilríkjum eftir að hafa sent inn umsókn um dvalarleyfi, finnskt ríkisfang, ESB-skráningu, ferðaskilríki eða dvalarleyfiskort.

Migrationsverket hefur enga fasta starfsemi á Álandseyjum. Stofnunin tekur við tímabókunum með um sex til sjö vikna millibili á svæðisskrifstofu Álandseyja í Maríuhöfn. Einstaklingar sem eru á Álandseyjum geta einnig skotið erindum um atvinnu- og dvalarleyfi til eins af þjónustustöðum Migrationsverket í Finnlandi. Nota má tímabókunarþjónustu Migrationsverket til að bóka tíma fyrir erindi, nánari upplýsingar er að finna á vefsíðunni um þjónustustaði Migrationsverket.

Ekki er hægt að sækja um hæli á þjónustustað Migrationsverket á Álandseyjum. Nánari upplýsingar fást hjá sendiráði Finnlands í þínu landi eða hjá Migrationsverket.

Á vefsíðum Info Norden má finna upplýsingar um atvinnu- og dvalarleyfi annars staðar á Norðurlöndum og þær stofnanir sem leita skal til vegna spurninga.