Æðri menntun á Álandseyjum

Í Finnlandi eru til tvær tegundir æðri menntastofnana: fagháskólar og háskólar. Á Álandseyjum er fagháskólinn Högskolan på Åland, sem býður upp á ýmsar námsbrautir sem leiða til bakkalárgráðu og eina námsbraut á meistarastigi.

Norrænir ríkisborgarar geta sótt um nám við Háskólann á Álandseyjum samkvæmt sömu skilyrðum og finnskir ríkisborgarar Álandseyja þökk sé samningi Norðurlanda um aðgang að æðri menntun.

Námsbrautir Háskólans á Álandseyjum sameina fræðilegt og verklegt nám. Þær eru á milli 3,5 og 4,5 árs langar og samanstanda af 210 til 270 námseiningum (studiepoäng, sp). Starfsþjálfun er hluti af náminu, sem leiðir til bakkalárgráðu.

Til að fá inngöngu í Háskólann á Álandseyjum þarftu að hafa lokið a.m.k. þriggja ára framhaldsskólanámi, verknámi eða samsvarandi námi. Ef hefur lokið námi utan Norðurlanda sem jafngildir stúdentsprófi þarftu að skila afriti af einkunnum ásamt löggiltri þýðingu á þeim á sænsku eða ensku.

Bakkalárnám í Háskólanum á Álandseyjum er á sænsku og þú þarft að geta sýnt fram á góða sænskukunnáttu til að fá inngöngu í það. Tiltekin námskeið og hluti námsefnis er á ensku og því þarftu einnig að hafa góð tök á ensku.

Námið er ókeypis öllum.

Háskólinn á Álandseyjum býður upp á raunvísindanám á meistarastigi á sviði orkusjálfvirkni og sjálfbærni. Til að fá inngöngu þarf bakkalárgráðu á raunvísindasviði og að minnsta kosti tveggja ára viðeigandi starfsreynslu að loknu prófi.

Námið er í samstarfi Háskólans á Álandseyjum og fagháskólans Arcada. Kennslan fer fram á ensku. Meistaranámið er gjaldskylt fyrir ríkisborgara landa utan ESB, Sviss og Liechtenstein.

Auk námsbrautanna er hægt að sitja einstök námskeið við Háskólann á Álandseyjum í gegnum Opna háskólann (Öppna högskolan), sem gefur einnig aðgang að námskeiðum finnskra háskóla. Engin inntökuskilyrði eru í Opna háskólanum; öllum er frjálst að skrá sig í opin námskeið. Opni háskólinn innheimtir skólagjöld fyrir hverja önn.

Ef þú vilt ekki ljúka fullu námi á Álandseyjum getur þú kannað möguleikana á skiptinámi. Hafðu samband við skólann þinn til að fá upplýsingar um hvort boðið sé upp á skiptinám hjá Háskólanum á Álandseyjum. Einnig eru til alþjóðlegar skiptiáætlanir á borð við Erasmus+ og Nordplus.

Nemendur við Háskólann á Álandseyjum geta lokið hluta náms eða starfsnáms sem skiptinemar í öðru landi.

Námsleiðbeiningar okkar innihalda gagnlegar upplýsingar fyrir fólk sem vill stunda nám í norrænu landi. Í þeim má meðal annars lesa um námslán og námsstyrki, stúdentaíbúðir og hvernig menntun fæst viðurkennd í norrænu löndunum.