Einkunnakvarðar á Álandseyjum

Álandseyjar hafa löggjafarvald á sviði menntunar og kennslu og einkunnavarðar eru mismunandi eftir því hvort námið er á grunnskóla-, framhaldsskóla- eða fagháskólastigi. Yngstu nemendurnir fá munnlegt mat en frá 3. bekk er þekking nemenda yfirleitt metin á tölulegum kvarða. 

Nánari upplýsingar um nám á Álandseyjum fást á síðunni Leiðbeiningar: nám á Álandseyjum.

Í 1. og 2. bekk fá nemendur munnlegt mat. Matið lýsir þekkingu, færni, þróun, ábyrgð og samvinnu nemandans. Í lok hverrar annar er gefið námsannarmat sem lýsir þekkingu og frammistöðu nemanda á önninni. Námsársmat tekur saman frammistöðu nemanda á öllu námsárinu. Í því kemur einnig fram hvort nemandi fari upp í næsta bekk. Umsjónarkennari undirritar matið og forráðamaður staðfestir móttöku upplýsinganna.

Frá 3. til 9. bekk eru þekking og færni metin með einkunnum á sjö stiga kvarða frá 4 til 10, þar sem 4 er fall og 10 er framúrskarandi þekking og færni. Í lok hvers skólaárs fá nemendur einkunn fyrir skólaárið og að minnsta kosti eina millieinkunn á skólaárinu. Ábyrgð og samvinna fá áfram munnlegt mat. Einkunnirnar eru undirritaðar af skólastjóra og umsjónarkennara. Forráðamaður staðfestir móttöku einkunnanna.

Nánari upplýsingar um matskerfið, þar á meðal fyrir nemendur sem fá heimakennslu, er að finna á vefsíðu Läroplan.ax um einkunnir og mat. Upplýsingar um grunnskóla er að finna á vefsíðu Info Norden um grunnskóla á Álandseyjum.

Framhaldsskólinn á Álandseyjum veitir kennslu á framhaldsskólastigi í tveimur skólum. Ålands lyceum ber ábyrgð á almennri framhaldsskólakennslu og Ålands yrkesgymnasium á starfsmenntun. Nánari upplýsingar er að finna á síðunni Framhaldsskóli og starfsmenntun á Álandseyjum.

Ålands lyceum

Við Ålands lyceum er einkunnakvarði frá 4 til 10, þar sem 4 er fall og 10 er framúrskarandi árangur. Að loknum hverjum námshluta fær nemandi tölulega einkunn eða umsögn. Skyldunámsþættir og valfrjálsir námshlutar, þemanám og framhaldsskólapróf geta verið metin með tölulegum einkunnum eða umsögn um að námi hafi verið lokið. Nánari upplýsingar um einkunnir og námsmat Ålands lyceum fást á vefsíðu skólans um tölulegar einkunnir og umsagnir.

Stúdentspróf eru metin með einkunnunum L, E, M, C, B, A og I. Einkunnir frá L–A merkja að nemandi hafi staðist próf en I er falleinkunn. Nánari upplýsingar um einkunnir stúdentsprófa er að finna a vef Framhaldsskólans á Álandseyjum eða vefsíðunni Einkunnamörk.

Verkmenntaskólinn á Álandseyjum

Í Verkmenntaskólanum á Álandseyjum er einkunnakvarðinn 0 til 5 notaður. Einkunnin 0 er fall og 5 er ágætiseinkunn. Undirbúningsnám fyrir háskóla (HUTH) er metið samkvæmt viðmiðum Ålands lyceum og námshlutalýsingum. Þessir námshlutar eru metnir á kvarðanum 4 til 10 eða með umsögn. Nánari upplýsingar um námsmat og einkunnir er að finna á vefsvæði Framhaldskólans á Álandseyjum.

Háskólinn á Álandseyjum er eini háskólinn á Álandseyjum. Í Háskólanum á Álandseyjum er einkunnakvarðinn frá 0 til 5 notaður, þar sem 0 merkir að þekkingu sé ábótavant en 5 frammúrskarandi þekkingu. Sum námskeið eru einungis metin með umsögninni staðist eða fall. Fram kemur í námskeiðslýsingu hvernig einkunn er gefin. 

Evrópska ECTS-námseiningakerfið er einnig notað og er námsframvinda metin í ECTS-einingum. ECTS auðveldar námsmönnum að flytja milli landa og fá erlend námskeið og próf sín viðurkennd. Eitt námsár í fullu námi samsvarar 60 námseiningum (studiepoäng, sp) eða ECTS einingum. Eru það 40 vikur í fullu námi. Nánari upplýsingar fást á síðunni Æðri menntun á Álandseyjum og á vefsíðunni Evrópska ECTS-námseiningakerfið.

Allir sem hafa lokið grunnskólaprófi eiga rétt á að sækja um nám í skóla á framhaldsskólastigi á Álandseyjum með einkunnum sínum. Sótt er um samkvæmt almennum kvóta eða einstaklingskvóta, eftir menntunarbakgrunni. Val er byggt á lokaeinkunn eða samsvarandi einkunn úr grunnskóla og öðrum mögulegum þáttum sem tekið er tillit til í valferlinu.

Sækja verður um samkvæmt einstaklingskvóta ef einstaklingur sækir um með grunnskólaprófi frá Álandseyjum, Finnlandi, öðru norrænu landi eða ESB-/-EES-ríki og það inniheldur sérstök námskeið á einstaklingsmiðaðri námsbraut. Einnig er hægt að sækja um í nám við Framhaldsskólann á Álandseyjum með því að taka próf. Upplýsingar um umsóknir og útreikning einkunna samkvæmt kvóta er að finna á vef Framhaldsskólans á Álandseyjum undir „Ansökan och antagning“ (umsóknir og inntaka).

Hægt er að sækja um nám við Háskólann á Álandseyjum með prófskírteini frá öllum löndum. Með prófskírteinum á öðrum tungumálum en sænsku þarf að fylgja þýðing á sænsku eða ensku. Útreikningur einkunna við Háskólann á Álandseyjum er mismunandi eftir námsleiðum. Matið er byggt á einkunnum í einstökum greinum, meðaleinkunn og starfsreynslu eða inntökuprófi. Engin föst viðmið eru um einkunnir; umsækjendur með hæstu einkunnir fá inngöngu. Nánari upplýsingar um hvernig einkunnir eru reiknaðar er að finna á vef háskólans undir Ansökan (umsókn).

Á síðu Info Norden má finna upplýsingar um einkunnakvarða í öðrum norrænum löndum og samskiptaupplýsingar þeirra stofnana sem geta svarað spurningum.