Að tilkynna flutning og skrá sig í þjóðskrá í Finnlandi

Muuton ilmoittaminen ja väestörekisteröinti Suomessa
Hér eru upplýsingar um hvernig hægt er að skrá sig í þjóðskrá í Finnlandi og tilkynna flutning, auk upplýsinga um búsetusveitarfélag eftir að flutt er til Finnlands. Þær reglur sem hér er greint frá gilda einnig á Álandseyjum.

Samkvæmt Norðurlandasamningnum um almannaskráningu getur hver íbúi á Norðurlöndum aðeins verið skráður í þjóðskrá eins norræns lands í einu. Samningurinn tryggir einnig að einstaklingar sem flytja milli landanna séu alltaf skráðir einhvers staðar. Í Finnlandi sjá sérstakar skráningarskrifstofur (fi. maistraatti, sæ. magistraterna) um búsetuskráningu í þjóðskrá. Um skráningu á Álandseyjum sér skrifstofa ríkisvaldsins á Álandseyjum.

Borgarar norrænna landa þurfa ekki sérstakt dvalar- eða atvinnuleyfi til að dvelja í Finnlandi.

Tilkynning um flutning

Flytji einstaklingur fasta búsetu sína til Finnlands frá öðru norrænu landi þarf hann að mæta á skráningarskrifstofu og skrá sig í eigin persónu ekki síðar en einni viku eftir flutning. Sé ætlunin að dvelja í Finnlandi lengur en þrjá mánuði en skemur en 12 mánuði þarf að skrá tímabundinn flutning. Nánari leiðbeiningar eru hér fyrir neðan.

Tímabundinn flutningur

Erlendur ríkisborgari sem hyggst dvelja skemur en þrjá mánuði í Finnlandi þarf ekki að skrá sig inn í landið.

Sé ætlunin að dvelja í Finnlandi lengur en þrjá mánuði en skemur en 12 mánuði þarf að skrá tímabundinn flutning. Ríkisborgarar norrænna landa geta skráð tímabundinn flutning sinn á skráningarskrifstofu þess sveitarfélags sem ætlunin er að dvelja í eða á skrifstofu skattayfirvalda. Framvísa þarf persónuskilríkjum við skráningu. Einnig er hægt að tilkynna tímabundinn flutning með eyðublaði sem fáanlegt er á pósthúsum og skráningarskrifstofum, eða á netinu með því að nota finnskt heimabankaauðkenni eða notendaauðkenni finnsku póstþjónustunnar. 

Borgarar ESB-/EES-landa, annarra en norrænu landanna, þurfa að skrá sig hjá innflytjendaþjónustunni (Maahanmuuttovirasto) vegna dvalar sem á að vara lengur en þrjá mánuði. Framvísa þarf persónuskilríkjum við skráningu. Borgarar landa utan ESB og EES þurfa að framvísa vegabréfsáritun eða dvalarleyfi. 

Dvelji einstaklingur tímabundið í Finnlandi verður hann ekki skráður þar til fastrar búsetu og nýtur þá heldur ekki þeirra réttinda sem fylgja fastri búsetu í landinu. Í vissum tilvikum er hægt að fá úthlutað tímabundinni kennitölu þyki ástæða til, t.d. vegna vinnu í Finnlandi.

 

Flutningur til lengri tíma

Sé flutningur hugsaður til frambúðar eða til 12 mánaða eða lengur þarf að tilkynna flutning til lengri tíma. Það er gert á skráningarskrifstofu viðkomandi sveitarfélags eða svæðis. Mæta þarf í eigin persónu til að skrá sig. Borgarar norrænna landa þurfa að sanna á sér deili með því að framvísa vegabréfi, öðrum opinberum skilríkjum með mynd þar sem þjóðerni kemur fram eða öðrum sambærilegum skjölum.

Borgarar ESB-/EES-ríkja utan Norðurlanda þurfa einnig að hafa með sér skráningarvottorð sem hægt er að fá hjá finnsku innflytjendaþjónustunni (Maahanmuuttovirasto). Borgarar ríkja utan ESB/EES þurfa að framvísa gildu dvalarleyfi. Einnig er hægt að sækja um að vera skráður inn í landið á grundvelli fjölskyldutengsla.

Þegar persónuupplýsingar umsækjanda hafa verið skráðar í þjóðskrá á skráningarskrifstofunni fær hann finnska kennitölu og búsetusveitarfélag.

Vert er að muna að skráningu í þjóðskrá fylgir ekki sjálfkrafa aðild að finnskum almannatryggingum heldur þarf að sækja um hana sérstaklega hjá finnsku almannatryggingastofnuninni, Kansaneläkelaitos (Kela).

Búsetusveitarfélag

Allir sem skráðir eru með fasta búsetu í Finnlandi eiga þar sitt búsetusveitarfélag. Skattlagning, framboð á heilbrigðisþjónustu og fleira ræðst meðal annars af búsetusveitarfélagi. Þegar einstaklingi hefur verið úthlutað búsetusveitarfélagi í Finnlandi getur hann sótt um skattkort og nýtt sér heilbrigðisþjónustu á vegum sveitarfélagsins.

Upplýsingar um lengri tíma flutning til Álandseyja og meðfylgjandi réttindi og þjónustu er að finna á síðunni Folkbokföring på Åland (Skráning í þjóðskrá á Álandseyjum).​​​​​​​

Búseta í fleiri en einu landi samtímis

Ef einstaklingur býr eða er skráður til heimilis í tveimur norrænum ríkjum samtímis ákveður viðeigandi yfirvald í landinu sem flutt er til (í Finnlandi er það skráningarskrifstofa, maistraatti) hvort skrá eigi búsetu viðkomandi í landinu sem flutt er til eða ekki.

Yfirleitt er það metið svo að land sem fólk hefur föst tengsl við vegna fjölskyldu, fasteigna eða vinnu sé búsetuland þess. Skráningaryfirvöld landsins sem flutt er til taka ákvörðun um búsetu einstaklings þegar hann hefur mætt á þarlenda skráningarskrifstofu og skráð sig. 

Athugið að ávallt þarf að sækja um það sérstaklega frá Kela að fá aðild að finnskum sjúkratryggingum á grundvelli búsetu.

Nánari upplýsingar

Spurning til Info Norden

Ef þú ert með spurningu skaltu fylla út eyðublaðið hérna:

ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.

Info Norden er upplýsingaþjónusta Norrænu ráðherranefndarinnar. Við gefum upplýsingar til fólks sem vill flytja, vinna, stunda nám, leita styrkjum eða hefja rekstur í öðru norrænu landi.
Leitaðu að skrifstofu Info Norden hérna