Helgidagar í Svíþjóð

Helgidagar eru svo til þeir sömu á öllum Norðurlöndum. Í Svíþjóð eru skírdagur og annar í hvítasunnu þó ekki helgidagar líkt og í öðrum norrænum löndum og eru þar af leiðandi ekki frídagar.

Aftur á móti eru þrettándi dagur jóla, allraheilagramessa, 1. maí, þjóðhátíðardagur Svía og miðsumarsdagur helgidagar og frídagar í Svíþjóð.

Helgidagar og aðrir frídagar í Svíþjóð

Í Svíþjóð er munur á helgidögum, sem oft eru nefndir „rauðir dagar“, og öðrum frídögum.

Í Svíþjóð eru 13 helgidagar á ári hverju. Alla jafna eiga starfsmenn á flestum vinnustöðum frí á helgidögum:

Margir fá þó frí á fleiri dögum en þessum. Ef páskadagskvöld, miðsumarskvöld, aðfangadagskvöld og gamlárskvöld eru talin með, sem oft teljast með sem frídagar, fá starfsmenn frí í nokkra daga í viðbót.

Janúar:

• Nýársdagur (Nyårsdagen) 1. janúar
• Þrettándi dagur jóla (Trettondag jul) 6. janúar

Mars-apríl: páskar

• Föstudagurinn langi (Långfredagen)
• Páskadagur (Påskdagen) getur fyrst verið 22. mars og síðast 25. apríl
• Annar í páskum (Annandag påsk)

Apríl–júní:

• Uppstigningardagur (Kristi himmelfärdsdag) er 40 dögum eftir páskadag, alltaf á fimmtudegi, getur fyrst verið 30. apríl og síðast 3. júní.

Maí:

• Alþjóðlegur baráttudagur verkalýðsins (Arbetarrörelsens internationella högtidsdag) 1. maí

Maí-júní: hvítasunna

• Hvítasunnudagur (Pingstdagen) er sjöundi sunnudagur eftir páska, getur fyrst verið 10. maí og síðast 13. júní.

Júní:

• Þjóðhátíðardagur Svía, 6. júní. Ef þjóðhátíðardagurinn fellur á helgi fá margir starfsmenn frí einn föstudag sem þeir geta tekið út síðar á árinu. Þetta fer eftir kjarasamningum. Það er ekki sjálfgefið að kjarasamningar gefi aukalegan frídag en oft er það svo.
• Miðsumarkvöld (Midsommarafton) er ekki helgidagur en margir fá frí á þessum degi samkvæmt samkomulagi á vinnustað eða samningi við vinnuveitanda. Miðsumarskvöld fellur alltaf á síðasta föstudagar mánaðarins.
• Miðsumarsdagur (Midsommardagen) er alltaf á laugardegi.

Október-nóvember:

• Allraheilagramessa (Alla helgons dag) er haldin hátíðleg laugardaginn milli 31. október og 6. nóvember.

Desember:

• Aðfangadagskvöld (Julafton), 24. desember, er ekki helgidagur en margir fá frí á þessum degi samkvæmt samkomulagi á vinnustað eða samningi við vinnuveitanda.
• Jóladagur (Juldagen) 25. desember
• Annar í jólum (Annandag jul) 26. desember
• Gamlárskvöld (Nyårsafton), 31. desember, ekki helgidagur en margir fá frí á þessum degi samkvæmt samkomulagi á vinnustað eða samningi við vinnuveitanda.

Hvað eru rauðir dagar í Svíþjóð?

Helgidagar eru almennt kallaðir rauðir dagar í Svíþjóð. Rauðir dagar eru sunnudagar og aðrir lögbundnir frídagar, svo sem vegna trúarhátíðar eða hefðar.

Auk þessara daga geta laugardagar og hátíðarkvöld einnig verið frídagar.

Hvað er „klämdag“ í Svíþjóð?

„Klämdag“ er dagur sem fellur milli tveggja frídaga, til dæmis helgidags og laugardags.

Stéttarfélög og einstakir vinnuveitendur geta komist að samkomulagi um að starfsfólk á tilteknum vinnustað fái frí á dögum sem falla milli frídaga. Á sumum vinnustöðum er gefið fullt frí en á öðrum má taka frí ef vinnuálag leyfir.

Ef þú ert í vafa um hvað gildir á þínum vinnustað skaltu hafa samband við trúnaðarmann stéttarfélagsins eða vinnuveitanda þinn.

Eru einhverjir lögbundnir lokunardagar í Svíþjóð?

Í Svíþjóð giltu lög um lögbundna lokunardaga (affärstidslag) til ársins 1972. Síðan þá hafa opnunartímar verið frjálsir.

Flestar verslanir eru opnar til kl. 21 og lokaðar á jóladag, nýársdag, páskadag, 1. maí, þjóðhátíðardaginn og miðsumarsdag. Engin lög banna þó verslunum að hafa opið.

Frekari upplýsingar um helgidaga og fánadaga í Svíþjóð