Kaup á vörum og þjónustu í Svíþjóð

Mobiltelefon med købevalg

Online shopping

Photographer
Abillion/Unsplash
Hér er að finna upplýsingar um réttindi neytenda og kaup á vörum og þjónustu í Svíþjóð, sem og tengiliðaupplýsingar fyrir farsímaáskrift, orkufyrirtæki og afnotagjöld.

Í Svíþjóð er gerð krafa um sænska kennitölu til að geta gert þjónustusamninga. Ef þú ert ekki með sænska kennitölu getur það takmarkað notkun þína á ýmissi þjónustu.

Réttindi neytenda í Svíþjóð

Þegar þú verslar í Svíþjóð, hvort sem það er á netinu eða í verslun á götunni, eru tilteknar reglur sem bæði þú og söluaðilinn þurfið að fylgja.

Ef þú ert í vafa um hvaða reglur gilda varðandi kaup getur þú kynnt þér réttindi þín í sænskum neytendalögum. Þú getur einnig leitað aðstoðar hjá sænskum neytendastofnunum.

Neytendalög í Svíþjóð

Í sænskum neytendalögum eru settar grundvallarreglur sem gefa neytendum og seljendum bæði réttindi og skyldur. Regluarnar veita kaupendum vernd. Við kaup á vöru í Svíþjóð þarf að hafa nokkra hluti í huga:

  • Réttur til að kvarta („reklamationsret“) er þrjú ár. Það þýðir að kvarta má við seljanda vegna galla og ef varan uppfyllir ekki skilyrði í þrjú ár.
  • Skilaréttur á vöru er ekki sjálfgefinn („öppet köp“) þegar vara er keypt í verslun.
  • Einungis er hægt er að skipta vöru eða fá vöruna endurgreidda ef verslunin býður upp á þá þjónustu.

Ef varan er gölluð eða eitthvað er að henni, á kaupandi fyrst og fremst rétt á að fá gert við hana eða nýja vöru í staðinn. Ef það er ekki hægt má í staðinn krefjast afsláttar af verði eða greiðslu fyrir að láta annan aðila gera við vöruna.

Til þess að eiga rétt á að hætta við kaupin og fá endurgreitt verður kaupandinn að sýna fram að gallinn skipti hann verulegu máli.

Ef kaup eru gerð við fjarsölu, til dæmis í gegnum síma eða netið, á kaupandinn rétt á að hætta við innan 14 daga.

Neytendastofnanir í Svíþjóð

Nánari upplýsingar um réttindi neytenda í Svíþjóð má nálgast á vefnum Hallå Konsument, sem er óháð ráðgjafaþjónusta á vegum sænska neytendaráðsins, Konsumentverket. Ráðið veitir einnig ráðgjöf um réttindi neytenda.

Ef þú hefur spurningar um réttindi þín sem viðskiptavinar banka eða tryggingafélags getur þú haft samband við Konsumenternas Bank- och Finansbyrå.

Viljirðu vita meira um verslun yfir landamæri innan ESB og EES geturðu leitað til skrifstofu Neytendamiðstöðvar Evrópu í Svíþjóð (ECC), sem gefur neytendum ókeypis ráðgjöf um kaup milli landa innan ESB, Íslands, Noregs og Bretlands.

Áskriftir í Svíþjóð

Það er ekki alltaf auðvelt að fá áskrift að farsímaþjónustu, nettengingu, hjá orkuveitu og svo framvegis án þess að búa í Svíþjóð og vera með sænska kennitölu eða BankID.

Hér má finna nánari upplýsingar um þær reglur sem gilda um kaup á vörum og þjónustu í Svíþjóð.

Afnotagjöld í Svíþjóð

Í Svíþjóð er almennt afnotagjald fyrir útvarp og sjónvarp innheimt sem hluti af skatti.

Farsímar, heimilissímar og breiðband í Svíþjóð

Þeir sem ekki eru skráðir í þjóðskrá í Svíþjóð, geta lent í erfiðleikum með að gerast áskrifendur hjá símafyrirtæki.

Hafa skal samband við það fyrirtæki sem óskað er eftir áskrift hjá, til að fá upplýsingar um hvaða möguleikar eru fyrir hendi fyrir þá sem ekki eru skráðir í þjóðskrá í Svíþjóð.

Ef einstaklingur hefur ekki verið skráður í þjóðskrá mörg undanfarin ár, munu mörg fyrirtækjanna krefjast þess að fá að sjá launaseðla eða einhverjar aðrar upplýsingar um tekjur viðkomandi. Stundum krefjast fyrirtækin fyrirframgreiðslu.

Þegar um er að ræða farsíma er hægt að kaupa inneignarkort, þar sem greitt er fyrir notkun fyrirfram. Ekki er nauðsynlegt að hafa sænska kennitölu til að kaupa inneignarkort.

Heimasími, stafrænt sjónvarp og breiðband í Svíþjóð

Í flestu nýlegu leiguhúsnæði í Svíþjóð er hægt að fá heimasíma, stafrænt sjónvarp og breiðband í gegnum netið.

Hægt er að velja milli fyrirtækja en valið er þó háð búsetu.

Raforkufyrirtæki og dreifingaraðilar í Svíþjóð

Í Svíþjóð er frjálst val milli 120 orkufyrirtækja, en ekki um dreifingaraðila.

Dreifingaraðilinn á netið þar sem viðkomandi á heima og innheimtir alltaf fyrir dreifingu á rafmagni, engu er hægt að ráða um það.

Einstaklingar eiga hins vegar val um hvaða orkufyrirtæki þeir skipta við. Ef ekki er valið orkufyrirtæki sér dreifingaraðilinn um að velja það. Það leiðir yfirleitt til þess að kostnaður vegna rafmagns verður óþarflega hár. Áður en orkufyrirtæki er valið er gott að bera saman verð á Elpriskollen.se.

Nauðsynlegt er að kynna sér skilmála rafmagnssamningsins áður en hann er undirritaður. Auk verðsins er gott að kynna sér uppsagnarfrest, binditíma og hvað verður um samninginn þegar hann rennur út.

Við flutninga ber að segja upp samningum um rafmagn, bæði við dreifingaraðila og orkufyrirtækið.

Upplýsingar um lánshæfi í Svíþjóð

Aðilar sem lána peninga eða veita þjónustu sem greiðist seinna, þurfa að geta metið hvort þeir vilja lána viðkomandi.

Til að einfalda lánshæfismat eru reknar skrifstofur sem sérhæfa sig í lánshæfismati, sem gefa lánveitendum upplýsingar um einstaklinga sem óska eftir láni. Fullar og nákvæmar upplýsingar hjálpa lánveitandanum að meta áhættu á tapi og öðrum vandamálum.

Lánshæfisskýrsla er fyrst og fremst um efnahagslegar aðstæður. Aðrar persónulegar upplýsingar geta fylgt með, til dæmis um hjúskaparstöðu einstaklings eða hvort hann hefur flutt frá öðru landi.

Ef einstaklingur býr og/eða starfar í öðru landi, getur fyrirtækið sem hann/hún ætlar að skipta við ekki séð hvort hann/hún er með tekjur í gegnum lánshæfisskrifstofur í Svíþjóð. Þess vegna getur verið nauðsynlegt að sýna fram á tekjur á annan hátt, til að mynda með því að fá laun greidd inn á bankareikning í Svíþjóð.

Söluaðilinn tekur viðskiptalega ákvörðun sem byggir á áhættumati lánshæfismatsskrifstofunnar um, hvort hann vill samþykkja kaup einstaklings á vöru eða þjónustu. Þeir mega þó ekki mismuna ESB/EES-ríkisborgurum á grundvelli þjóðernis. Erfitt getur verið fyrir fólk sem er búsett eða starfar í öðru landi að kaupa tiltekna þjónustu í Svíþjóð. Hafa skal samband við söluaðila til að fá frekari upplýsingar um hvernig best er að sýna fram á lánshæfi.

Hafa samband við samtök eða stofnun
Spurning til Info Norden

Ef þú ert með spurningu eða ef þú hefur rekist á hindrun í norrænu landi skaltu fylla út eyðublað okkar.

ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.

Info Norden er upplýsingaþjónusta Norrænu ráðherranefndarinnar. Við gefum upplýsingar til fólks sem vill flytja, vinna, stunda nám, leita styrkjum eða hefja rekstur í öðru norrænu landi.
Leitaðu að skrifstofu Info Norden hérna