Tryggingar í Finnlandi

Þegar búið er í Finnlandi þarf að huga að tryggingum á vegum einkarekinna tryggingafélaga auk finnskra almannatrygginga.. Tryggingar á vegum einkaaðila eru meðal annars umferðartrygging og valfrjálsar trygginga á borð við  heimilistryggingu, bifreiðartryggingu, sjúkratryggingu á vegum tryggingafélags, slysatryggingu, líftryggingu og ferðatryggingu.

Hér fyrir neðan eru upplýsingar um helstu tryggingaform í Finnlandi.

• Heimilistrygging er oft skilyrði fyrir því að fá leigða íbúð.
• Öllum eigendum vélknúinna ökutækja í Finnlandi er skylt að hafa almenna ökutækjatryggingu en bifreiðartrygging (kaskótrygging) er valkvæð.
• Tryggingafélögin selja ýmsar valfrjálsar sjúkratryggingar sem gera tryggðum einstaklingum kleift að sækja sér dýrari heilbrigðisþjónustu og -meðferðir en hið almenna lögbundna sjúkratryggingakerfi býður upp á.
• Slysatrygging dekkar kostnað sem fellur til vegna slysa, svo sem vegna læknismeðferða og lyfjakaupa.
• Ferðatrygging á vegum tryggingafélags veitir aukið öryggi meðan dvalið er tímabundið erlendis.

Fleiri tryggingar á vegum einkaaðila eru í boði, svo sem tryggingar vegna eignaspjalla, andláts eða endurgreiðslu lána. Nánari upplýsingar eru á vefsvæði finnska félags- og heilbrigðismálaráðuneytisins.

Það borgar sig að hafa samband við mörg tryggingafélög og fá tilboð. Þannig má fá hugmynd um almennt verðlag trygginga í Finnlandi og um framboð þjónustu hjá mismunandi félögum. Þú skalt kynna þér vandlega hvað er í boði áður en þú tekur ákvörðun. Nánari upplýsingar eru á vefsvæði FINE.

Á meðal tryggingafélaga sem starfa í Finnlandi eru Fennia, If, LähiTapiola, Pohjantähti, Pohjola Vakuutus, POP Vakuutus og Turva.

Fæst tryggingafélög í Finnlandi selja persónutryggingar þeim sem búa tímabundið í landinu. Yfirleitt er gerð krafa um að viðkomandi hafi fasta búsetu í Finnlandi eða eigi aðild að almannatryggingum þar. Heimilistrygging er þó yfirleitt í boði fyrir fólk með tímabundna dvöl í Finnlandi.

Ekki er kveðið á um skilmála tryggingafélaga í lögum, heldur sjá félögin sjálf um að útfæra þá. Nánari upplýsingar veita tryggingafélögin.

Sjúkratryggingar á vegum einkaaðila

Auk sjúkratrygginga almannatryggingastofnunar bjóða ýmis tryggingafélög upp á sjúkratryggingar sem gera tryggðum einstaklingum kleift að sækja sér dýrari heilbrigðisþjónustu og -meðferðir en almenna kerfið býður upp á. Þú þarft alltaf að tryggja þig í því landi þar sem þú hefur almannatryggingar. Viljir þú auka öryggi þitt meðan dvalið er tímabundið erlendis með því að tryggja þig á vegum einkaaðila er ferðatrygging eini kosturinn sem býðst.