Tollareglur í Finnlandi

Um búslóð og aðra muni sem fólk flytur inn frá ESB-löndum til Finnlands gilda aðrar reglur en um það sem flutt er inn frá löndum utan ESB.

Búslóðaflutningar til Finnlands frá öðru ESB-landi

Ef þú flytur til Finnlands innan tolla- og skattasvæðis Evrópusambandsins þarft þú ekki að gera finnskum tollayfirvöldum viðvart. Athugaðu þó að innflutningur á sumum munum og vörum er háður takmörkunum. Áfengi og tóbak eru einnig undanskilin tollfrelsinu innan ESB. 

Ef þú flytur til Finnlands frá landi sem er innan tollasvæðis ESB en utan skattasvæðisins, þá þarftu að gera grein fyrir búslóðinni í tollinum. Að vissum skilyrðum uppfylltum getur þú flutt búslóð þína til Finnlands án þess að greiða virðisaukaskatt. Nánari upplýsingar eru á vefsvæði finnskra tollayfirvalda.

Hyggist þú flytja bíl eða annað ökutæki til Finnlands skaltu leita nánari upplýsinga á vefsvæði finnskra tollayfirvalda.

Ef þú flytur til Finnlands frá landi utan tolla- og skattasvæðis ESB þarftu að gera grein fyrir búslóðinni í tollinum.

Almennt hefurðu leyfi til að flytja búslóð til Finnlands án þess að greiða toll eða virðisaukaskatt ef þú hefur haft fasta búsetu utan ESB samfleytt í að minnsta kosti 12 mánuði og búslóðin hefur verið í þinni vörslu og notkun í að minnsta kosti sex mánuði. Þú þarft að gera grein fyrir búslóðinni í tollskýrslu þegar hún kemur til Finnlands.

Hafir þú haft fasta búsetu utan ESB skemur en í 12 mánuði er, að vissum skilyrðum uppfylltum, hægt að líta svo á að munir, sem þú keyptir áður í Finnlandi með virðisaukaskatti og fluttir með þér út fyrir tolla- og skattsvæði ESB, séu að koma aftur inn á tolla- og skattasvæði ESB og þarf þá ekki að greiða toll eða virðisaukaskatt af innflutningnum. Gera þarf grein fyrir munum sem keyptir voru erlendis í tollinum. Nánari upplýsingar eru á vefsvæði finnskra tollayfirvalda.

Hyggist þú flytja bíl eða annað ökutæki til Finnlands skaltu leita nánari upplýsinga á vefsvæði finnskra tollayfirvalda.

Hafir þú verið á ferðalagi utan tolla- og skattasvæðis ESB getur þú flutt vörur sem þú keyptir með þér til Finnlands í persónulegum farangri þínum án þess að greiða af þeim skatt eða toll, ef verðmæti þeirra fer ekki yfir tiltekið hámark. 

Ef þú hefur verið á ferðalagi innan tolla- og skattasvæðis ESB getur þú flutt með þér vörur sem þú keyptir á ferðalaginu án takmarkana á verðmæti. Athugaðu þó að takmarkanir gilda um tilteknar vörur og muni. Nánari upplýsingar eru á vefsvæði finnskra tollayfirvalda.

Um innflutning á gæludýrum, áfengi, tóbaki, nikótínpúðum, rafrettum og nikótínvökva, lyfjum, matvælum, vopnum, öðrum hættulegum munum og ökutækjum gilda sérstakar reglur. Nánari upplýsingar eru á vefsvæði finnskra tollayfirvalda.

Ef þú pantar pakka frá ESB-landi til Finnlands þarftu ekki að gera grein fyrir innihaldinu í tolli eða greiða af því toll eða virðisaukaskatt.

Ef pakkinn kemur frá ESB-landi sem er utan skattasvæðis ESB þarftu að gera grein fyrir innihaldinu í tolli og greiða af því virðisaukaskatt. Ekki þarf þó að greiða toll. 

Ef sendingin kemur til Finnlands frá landi utan ESB þarft þú að gera grein fyrir innihaldinu í tolli og greiða af því virðisaukaskatt, og ef kaupverð vörunnar án sendingarkostnaðar er hærra en 150 evrur þarftu einnig að greiða toll af því. 

Af sumum vörum, til dæmis áfengi, þarf að greiða vörugjald óháð því frá hvaða landi sendingin kemur. Nánari upplýsingar eru á vefsvæði finnskra tollayfirvalda.

Ef þú færð gjöf senda til Finnlands frá landi innan ESB þarf ekki að gera grein fyrir innihaldinu í tolli eða greiða af því toll eða virðisaukaskatt. 

Komi gjöfin frá landi sem er innan ESB en utan skattasvæðis ESB þarf að gera grein fyrir innihaldinu í tollinum. Þá þarftu að greiða virðisaukaskatt ef verðmæti gjafarinnar er meira en 45 evrur, en þú þarft ekki að greiða af henni toll. 

Ef þú færð gjöf senda til Finnlands frá landi utan ESB þarftu að gera grein fyrir gjöfinni í tollinum. Þá þarftu að greiða virðisaukaskatt ef verðmæti gjafarinnar er meira en 45 evrur, og toll ef verðmætið án sendingarkostnaðar er hærra en 150 evrur. 

Af áfengi og sumum tóbaksvörum þarf að greiða vörugjald óháð því frá hvaða landi sendingin kemur. Nánari upplýsingar eru á vefsvæði finnskra tollayfirvalda.

Hvar fæ ég nánari upplýsingar?