Tilnefningar til verðlauna Norðurlandaráðs 2023

14 norrænar myndabækur, unglingabækur og ljóðabækur eru tilnefndar til barna- og unglingabókmenntaverðlauna Norðurlandaráðs 2023. Verkin sem tilnefnd eru í ár innihalda meðal annars tímalaus ævintýri, full af lífi, þar sem fjölbreytileikinn er ekki boðskapurinn í sjálfu sér heldur aðeins eitt atriði sem ljær frásögnunum trúverðugleika.

Sex norrænar kvikmyndir eru tilnefndar til kvikmyndaverðlauna Norðurlandaráðs 2023. Handritshöfundur, leikstjóri og framleiðandi skipta verðlaununum á milli sín enda er kvikmyndagerð listgrein þar sem árangurinn verður til í nánu samstarfi þessara aðila.  

Þrettán tónlistarmenn, hljómsveitir og hópar eru tilnefndir til tónlistarverðlauna Norðurlandaráðs 2023 fyrir hátt listrænt gildi. Tilnefningar ársins endurspegla breitt svið tónlistarstefna, allt frá sígildri tónlist, djassi og þjóðlagatónlist til listrænnar samtímatónlistar og tilraunakenndrar rokk- og popptónlistar, og á bak við þær allar eru tónskáld frá norrænu löndunum.

Endurunninn textíll, hringrásarkerfi í fatahönnun, fyrsta verslunin á Grænlandi sem selur endurnýttar vörur frá einstaklingum og kerfi fyrir tískuvikur. Alls eru sjö verkefni tilnefnd til umhverfisverðlauna Norðurlandaráðs 2023 sem að þessu sinni snúast um textíliðnaðinn og áskoranir honum tengdar í umhverfis- og loftslagsmálum.

Harmrænar, dásamlegar og töfrandi hliðar lífsins eru á meðal gegnumgangandi stefja í hinum 14 norrænu skáldsögum og ljóðabókum sem tilnefndar eru til bókmenntaverðlauna Norðurlandaráðs 2023. Þessi mögnuðu verk koma frá öllum norrænu löndunum og málsvæðunum.

Hægt verður að sjá beina útsendingu alls staðar á Norðurlöndum frá því þegar tilkynnt verður um handhafa verðlauna Norðurlandaráðs fyrir barna- og unglingabókmenntir, kvikmyndir, bókmenntir, umhverfismál og tónlist.

Dagskráin hefst kl. 18.30 að íslenskum tíma (19.30 CET) og verður í beinni útsendingu á norden.org og einnig á NRK1 kl. 19.00 að íslenskum tíma (20.00 CET).