Réttur til heilbrigðisþjónustu á Grænlandi

Fólk sem er búsett á Grænlandi á rétt á ókeypis heilbrigðisþjónustu, þar á meðal ávísuðum lyfjum, eins og annars staðar á Norðurlöndum. Greiða þarf fyrir hjálpartæki svo sem gervitennur og gleraugu. Tannlæknaþjónusta er án endurgjalds í einhverjum mæli.

Vegna þeirra áskorana sem blasa við sökum stærðar Grænlands og strjálbýlis er mælt með því að fólk tryggi sig fyrir sjúkraflutningum frá slysstað til næstu byggðar með heilsársbúsetu.

Fólk sem er búsett á Grænlandi á rétt á þeirri heilbrigðisþjónustu sem borgurum landsins stendur til boða.

Þau sem búa í Danmörku eða í Færeyjum og starfa á Grænlandi eiga rétt á ókeypis heilbrigðisþjónustu við skyndileg veikindi.

Norrænn sáttmáli um almannatryggingar frá 1. maí 2014 gildir um fólk sem er búsett utan ríkjasambandsins en innan Norðurlanda.

Þú átt rétt á meðferð við skyndilegum sjúkdómum og greiðslu á aukakostnaði vegna heimferðar til búsetulands þíns.

Ekki er hægt að fá evrópskt sjúkratryggingakort á Grænlandi.

Ef þú býrð í Danmörku og starfar eða stundar nám á Grænlandi áttu rétt á ókeypis heilbrigðisþjónustu við skyndileg veikindi. Mundu að hafa gula sjúkratryggingakortið þitt meðferðis til tímabundinnar dvalar á Grænlandi. Ef þú býrð í Færeyjum og starfar eða stundar nám á Grænlandi áttu sömuleiðis rétt á ókeypis heilbrigðisþjónustu. Hafðu meðferðis skjöl því til sönnunar að þú eigir rétt á heilbrigðisþjónustu gegnum færeyskan sjúkratryggingasjóð.

Búir þú utan ríkjasambandsins, en innan Norðurlanda eða ESB/EES, ertu tryggð/t/ur á grundvelli Norræna sáttmálans um almannatryggingar líkt og aðrir Norðurlandabúar. Mundu að hafa meðferðis skjöl því til sönnunar að þú eigir rétt á heilbrigðisþjónustu í þínu búsetulandi. Það getur verið sjúkratryggingakort ESB, kort gefið út af tilteknu landi eða annað þvíumlíkt.

Þetta þýðir að þú átt rétt á meðferð vegna skyndilegra veikinda og niðurgreiðslu aukakostnaðar í tengslum við heimferð til búsetulandsins, en þá verður þú að geta sýnt fram á hvar þú átt fasta búsetu.

Heilbrigðisþjónusta á Grænlandi er að mestu leyti opinber og án endurgjalds fyrir borgara landsins. Eftir því sem staðbundnar og landfræðilegar aðstæður leyfa átt þú, sem íbúi á Grænlandi, rétt á eftirtalinni þjónustu án endurgjalds:   

• Heimilislæknar og opinber sjúkrahús
• Ráðgjafar sveitarfélaganna og heilsugæslustöðvar
• Tannlæknaþjónusta á vegum hins opinbera
• Sérgreinalæknar
• Lyfseðilsskyld lyf
• Heimaþjónusta

Búir þú á svæði þar sem engin heilbrigðisþjónusta er í boði áttu rétt á flutningi á svæðissjúkrahús eða landspítala. Það er þó aðeins að því gefnu að meðferðinni sé ávísað af lækni.

Find sundhedspersoner og behandlingssteder i Grønland