Leiðbeiningar: Að flytja til Finnlands

Ef þú flytur til Finnlands þarftu að tilkynna það yfirvöldum og ýmsum stofnunum landsins. Flutningar til Finnlands geta haft áhrif á almannatryggingar þínar, heilbrigðisþjónustu, skattlagningu og ýmis réttindi. Á þessari síðu finnur þú einnig greinargóðarn upplýsingar um dvalar- og atvinnuleyfi, rafræna auðkenningu í Finnlandi, húsnæðimál, tryggingamál, bankaþjónustu, tungumálanámskeið og um það að flytja búslóð, bíl og gæludýr til Finnlands.

Ef þú flytur til Finnlands vegna vinnu eða náms skaltu líka kynna þér leiðbeiningasíður okkar um vinnu og nám í Finnlandi.

Borgarar norrænna ríkja þurfa ekki dvalar- eða starfsleyfi í Finnlandi. Þó gilda ákveðin skilyrði fyrir ríkisborgara ESB- eða EES-landa utan Norðurlanda og fyrir borgara annarra ríkja sem vilja dvelja eða starfa í Finnlandi. Nánari upplýsingar eru á síðunni Dvalar- og starfsleyfi í Finnlandi.

Upplýsingar um að tilkynna flutning og skrá sig í þjóðskrá Finnlands eru á síðunni Skráning í þjóðskrá í Finnlandi.

Ef þú flytur til Finnlands til lengri tíma en eins árs og uppfyllir skilyrði fyrir skráningu í þjóðskrá, þá eru persónuupplýsingar þínar skráðar í finnsku þjóðskrána og þú færð finnska kennitölu og búsetusveitarfélag. Í vissum tilvikum getur þú fengið kennitölu þó að búseta þín í Finnlandi teljist ekki varanleg. Nánari upplýsingar um finnska kennitölu eru á síðunni Finnsk kennitala.

Til þess að geta nýtt þér rafrænar auðkennisleiðir í Finnlandi, þ.e. netbankaauðkenni, borgaraauðkenni og farsímaauðkenni, þarft þú að hafa finnska kennitölu. Nánari upplýsingar eru á síðunni Rafræn auðkenning í Finnlandi.

Það eitt að flytja til Finnlands veitir ekki rétt á bótum úr finnskum almannatryggingum. Ef þú sækir um bætur mun finnska almannatryggingastofnunin, Kansaneläkelaitos, líta til þess hvort þú hafir varanlega búsetu í Finnlandi eða hvort þú eigir rétt á bótum á grundvelli atvinnu. 

Þú getur aðeins átt aðild að almannatryggingum í einu landi í einu. Yfirleitt áttu aðild að almannatryggingum í landinu sem þú starfar í. Ef þú ert ekki á vinnumarkaði er meginreglan sú að þú eigir aðild að almannatryggingum í búsetulandi þínu. Nánari upplýsingar eru á síðunni Almannatryggingar í Finnlandi fyrir fólk sem býr þar eða starfar og síðunni Hvar átt þú aðild að almannatryggingum?

Ef þú býrð eða starfar í Finnlandi átt þú rétt á heilbrigðisþjónustu þar. Þú átt einnig rétt á vissri þjónustu meðan þú dvelur tímabundið í Finnlandi. Að auki áttu rétt á að sækja tiltekna heilbrigðisþjónustu í öðru norrænu landi meðan þú býrð í Finnlandi, eða í Finnlandi meðan þú býrð í öðru norrænu landi. Nánari upplýsingar eru á síðunni Réttur til heilbrigðisþjónustu í Finnlandi.

Upplýsingar um skattlagningu í Finnlandi eru á síðunni  Skattar í Finnlandi. Á norrænu skattagáttinni, Nordisk eTax, eru líka  gagnlegar upplýsingar um skattlagningu í norrænu löndunum. 

Upplýsingar um mismunandi búsetuform, húsnæðisleit og húsnæðisstyrk eru á síðunni Búseta í Finnlandi.

Öll börn sem búsett eru í Finnlandi og hafa ekki náð grunnskólaaldri eiga rétt á plássi í dagvistun frá níu mánaða aldri. Ef þú átt barn undir þriggja ára sem ekki hefur fengið dagvistunarpláss á vegum sveitarfélags getur verið að þú eigir rétt á heimgreiðslum. Forskólanám án endurgjalds og hefst ári áður en grunnskólinn byrjar. Grunnskólanám án endurgjalds hefst á því ári sem barnið verður sjö ára.

Ef þú flytur til Finnlands með barn er gott að athuga fyrir flutningana hvernig og hvenær þurfi að sækja um dagvistunar- eða skólapláss fyrir barnið, þar sem slíkt er gert í gegnum búsetusveitarfélag. Nánari upplýsingar um dagvistun og forskóla eru á síðunni Dagvistun barna í Finnlandi. Nánari upplýsingar um heimgreiðslur vegna barna eru á síðunni Foreldrabætur í Finnlandi og upplýsingar um grunnskólanám á síðunni Grunnskólanám í Finnlandi.

Hér fyrir neðan finnur þú leiðbeiningar um það að flytja búslóð, gæludýr og bifreið til Finnlands, auk upplýsinga um tungumálanámskeið, bankamál og ýmsa þjónustusamninga.

Búslóðaflutningar og gæludýr í Finnlandi

Svör við spurningum varðandi búslóðaflutninga er að finna á síðunni Tollareglur í Finnlandi. Upplýsingar um að ferðast og flytja með gæludýr eru á síðunni Að ferðast með hund eða kött til Finnlands.

Ökutæki og ökuréttindi

Fjallað er um innflutning og skráningu ökutækja á síðunni Ökutæki í Finnlandi. 

Ökuskírteini sem gefið er út í öðru norrænu landi er einnig gilt í Finnlandi. Nánari upplýsingar eru á síðunni Ökuréttindi í Finnlandi.

Tungumálanámskeið í Finnlandi

Byrjenda- og framhaldsnámskeið í finnsku eru í boði um allt landið, til dæmis í símenntastofnunum og lýðskólum sem eru í langflestum sveitarfélögum Finnlands. Nánari upplýsingar eru á síðunni Tungumálanámskeið í Finnlandi.

Bankareikningur og húsnæðislán í Finnlandi

Upplýsingar um það að opna bankareikning og um kjör húsnæðislána eru á síðunni Bankareikningur í Finnlandi.

Tryggingar í Finnlandi

Upplýsingar um heimilis- og umferðartryggingu, auk valfrjálsra trygginga á borð við ferðatryggingu og slysatryggingu, eru á síðunni Tryggingar í Finnlandi.

Kaup á vöru og þjónustu í Finnlandi

Upplýsingar um síma- og internetþjónustu og rafmagnsþjónustu í Finnlandi eru á síðunni Kaup á vöru og þjónustu í Finnlandi.

Sért þú að flytja til Finnlands frá öðru norrænu landi skaltu líka kynna þér leiðbeiningasíður okkar um það að flytja frá einu landi til annars.