Kaup á vöru og þjónustu í Finnlandi

Í Finnlandi getur þú þurft finnska kennitölu til þess að gera tiltekna þjónustusamninga. Einnig getur það takmarkað notkun þína á vissum þjónustuleiðum að hafa ekki finnska kennitölu. Nánari upplýsingar um finnska kennitölu eru á síðunni Kennitala í Finnlandi.

Sumir þjónustuaðilar gera kröfu um finnska kennitölu til að stofna til fastrar farsímaáskriftar með mánaðargjaldi.

Í stað fastrar áskriftar er hægt að velja svokallaða frelsisáskrift þar sem þú greiðir fyrirfram fyrir notkun. Alla jafna þarf ekki að hafa finnska kennitölu til að stofna til frelsisáskriftar. Þú getur stofnað til frelsisáskriftar og keypt viðbótargagnamagn á netinu, í útibúum símafyrirtækja eða hinum ýmsu verslunum og sjoppum. Til að kaupa á netinu þarf yfirleitt að hafa einhverja rafræna auðkenningarleið sem tekin er gild í Finnlandi. Nánari upplýsingar eru á síðunni Rafræn auðkenning í Finnlandi

Nánari upplýsingar eru á vefsvæðum Traficom (finnsku samgöngu- og samskiptastofnunarinnar) og InfoFinland.fi.

Internetþjónusta

Samskipti einstaklinga við opinberar stofnanir og fyrirtæki fara núorðið að stórum hluta fram í gegnum internetið. Bankar veita þjónustu sína í æ meiri mæli á netinu og sumir þeirra rukka viðskiptavini jafnvel um sérstakt þjónustugjald fyrir að greiða reikninga í útibúi fremur en í netbankanum. Einnig er hægt að sækja um bætur hjá almannatryggingastofnun (Kela) og skila skattframtali á netinu. Þegar slíkum persónulegum málum er sinnt gegnum netið þarf fólk að auðkenna sig með innskráningu í netbanka eða rafrænu nafnskírteini.

Nettengdar tölvur fyrir almenning eru meðal annars á bókasöfnum. Einnig eru margir bankar með tölvur í útibúum sínum fyrir viðskiptavini til að nota netbanka í og greiða reikninga. Margar vinnumiðlunarskrifstofur eru með nettengdar tölvur sem fólk getur nýtt sér í atvinnuleit.

Á opinberum stöðum á borð við bókasöfn, skóla og veitingastaði er oft þráðlaust net sem viðskiptavinir geta tengst í eigin fartölvum án endurgjalds.

Að stofna til internetáskriftar

Sumir þjónustuaðilar gera kröfu um finnska kennitölu til að stofna til internetáskriftar. Einnig getur þurft finnskt símanúmer til að nýta netverslanir sumra þjónustuaðila.

Frelsisáskrift er hægt að kaupa án finnskrar kennitölu, en þá er greitt fyrirfram fyrir netnotkun.

Til að geta fengið breiðbandstengingu getur þú þurft að hafa finnska kennitölu. Það er misjafnt eftir þjónustuaðilum. Nánari upplýsingar eru á vefsvæði Traficom.

Hafir þú ekki finnska kennitölu getur þú keypt frelsisáskrift þar sem borgað er fyrirfram fyrir netnotkun. Nánari upplýsingar eru á vefsvæðum þjónustuaðila. 

Ef þú ert með bókasafnskort getur þú líka komist ókeypis á netið á bókasöfnum. Á sumum af þjónustustöðvum vinnumálaskrifstofunnar TE-palvelut er einnig hægt að komast á netið til að leita sér að vinnu.

Á opinberum stöðum, svo sem í skólum, á kaffihúsum og veitingastöðum er oft hægt að tengjast þráðlausu neti án endurgjalds með eigin tölvu eða snjalltæki. Nánari upplýsingar eru á vefsvæðinu InfoFinland.fi.

Yfirleitt semja einstaklingar beint um rafmagnsnotkun sína við þjónustuaðila, hafi ekki verið samið um annað við leigusala eða húsfélag. Þú getur gert rafmagnsþjónustusamning við þann söluaðila rafmagns sem þú kýst en samningar um dreifingu rafmagns eru alltaf gerðir beint við rafveitu á staðnum. Það nægir þó að þú hafir samband við söluaðila rafmagns sem sér svo um að semja við rafveituna um dreifingu rafmagnsins.

Þú getur gert samning um rafmagnsþjónustu án þess að hafa finnska kennitölu. Hafir þú ekki finnska kennitölu gæti söluaðilinn beðið þig að gefa upp fæðingardag þinn eða vegabréfsnúmer.

Þú getur gert samanburð á rafmagnsverði á vefsvæðinu Sähkönhinta.fi sem haldið er úti af finnsku orkumálastofnuninni.

Nánari upplýsingar um verð og samninga eru á vefsvæðum Energiateollisuus (samtaka finnskra iðnrekenda á sviði orkumála) og Energiavirasto (finnsku orkumálastofnunarinnar).

Til að geta tekið á móti stafrænum sjónvarpsútsendingum þarf að hafa netlykil sem ýmist er tengdur við sjónvarpstækið eða innbyggður í það.

Í Finnlandi verða allar sjónvarpsstöðvar í HD-útsendingu frá og með vorinu 2025 en þá hættir finnska ríkissjónvarpið hefðbundnum útsendingum. Eftir það verður öll útsending á svokölluðu HD-formi og ekki verður lengur hægt að horfa á sjónvarp án netlykils. Nánari upplýsingar um skiptin yfir í HD-útsendingar eru í HDTV-leiðarvísinum frá Traficom.

Í Finnlandi er ekki innheimt afnotagjald fyrir sjónvarpsnotkun en þess í stað greiða skattskyldir einstaklingar almannaútvarpsskatt. Nánari upplýsingar eru á vefsvæði finnskra skattayfirvalda (Verohallinto).

Upplýsingar um fjárhag lýsa greiðslugetu einstaklinga. Í Finnlandi átt þú rétt á að skoða upplýsingar um þinn fjárhag einu sinni á ári án endurgjalds. Þú getur flett þeim upp hjá fyrirtæki sem hefur umsjón með slíkum upplýsingum.

Ef þú trassar ítrekað að greiða reikninga eða aðrar skuldir getur þú fengið athugasemd um vanskil í fjárhagsskrá þína. Athugasemd um vanskil er yfirleitt sýnileg í kerfinu í 2-3 ár. Nánari upplýsingar eru á vefsvæði finnsku samkeppnis- og neytendastofnunarinnar.

Á Norðurlöndum hafa einkafyrirtæki umsjón með upplýsingum um fjárhag og greiðslugetu. Þessi fyrirtæki hafa gert samstarfssamninga við fyrirtæki annars staðar á Norðurlöndum og því geta athugasemdir um vanskil frá Finnlandi líka verið aðgengilegar í öðrum norrænum löndum í einhverjum tilvikum.

Ef vandamál koma upp getur þú haft samband við finnsku neytendaráðgjöfina. Neytendaráðgjöfin ráðleggur neytendum um réttindi þeirra og skyldur, leiðbeinir neytendum og fyrirtækjum ef vandamál eða ósætti koma upp og miðlar málum ef ekki tekst að leysa úr ágreiningi. Nánari upplýsingar eru á vefsvæði finnsku samkeppnis- og neytendastofnunarinnar.

Vegna ágreiningsmála um viðskipti yfir landamæri Finnlands getur þú haft samband við Evrópsku neytendamiðstöðina. Nánari upplýsingar eru á vefsvæði Evrópsku neytendamiðstöðvarinnar.