Lífeyriskerfið í Danmörku
Danska lífeyriskerfið samanstendur af nokkrum tegundum lífeyris. Þú getur átt rétt á ellilífeyri (folkepension), ATP-lífeyri til æviloka, vinnumarkaðslífeyri og séreignarlífeyri.
Hvaða lögbundnu lífeyrisgreiðslum getur þú átt rétt á í Danmörku?
Þú getur lesið nánar um danskan ellilífeyri (folkepension), lífeyri fyrir eldri borgara (seniorpension) og örorkulífeyri (førtidspension) á vefsíðum Info Norden.
Hvað er ATP-lífeyrir til æviloka?
Lífeyrir til æviloka, ATP Livslang Pension, er lögbundið lífeyriskerfi sem nærri allir greiða til. Lífeyririnn er greiddur út sjálfkrafa þegar lífeyrisaldri er náð.
Við andlát geta maki eða börn fengið greidda ákveðna upphæð frá ATP.
Nánari upplýsingar eru á vefnum borger.dk.
Hvað er skyldubundinn lífeyrissparnaður?
Ef þú færð greiðslur frá hinu opinbera, svo sem atvinnuleysisdagpeninga, fæðingarorlofsgreiðslur, eftirlaun, sveigjanlegan lífeyri, örorkulífeyri, fjárhagsaðstoð, lífeyri fyrir eldri borgara eða sjúkradagpeninga greiðir ríkið fyrir þig í lífeyrissjóð.
Sjá má allan listann yfir greiðslur og lesa nánar um lögbundinn lífeyri á borger.dk.
Hvað eru eftirlaun?
Eftirlaun (efterløn) er kerfi sem getur gert fólki kleift að hætta að vinna áður en lífeyrisaldri er náð. Það hversu snemma þú getur farið á eftirlaun fer meðal annars eftir því hvenær þú ert fædd/ur. Uppfylla þarf ákveðin skilyrði til þess að eiga rétt á eftirlaunum. Þessi skilyrði ráðast líka af fæðingarári þínu.
Þú þarft meðal annars að vera félagi í atvinnuleysistryggingasjóði, hafa náð eftirlaunaaldri og hafa greitt eftirlaunaiðgjald. Að jafnaði þarftu að hafa greitt eftirlaunaiðgjald í 30 ár og hafa byrjað að greiða eigi síðar en þegar þú varðst 30 ára. Þó gilda vægari reglur fyrir suma árganga.
Nánari upplýsingar á vefslóðinni borger.dk.
Hvað er vinnumarkaðslífeyrir og einstaklingsbundinn lífeyrir?
Vinnumarkaðslífeyrir er lífeyriskerfi sem tengist starfi þínu. Hann getur til dæmis verið ákveðinn með kjarasamningi, sem starfstengdur lífeyrir á vinnustaðnum þínum eða sem lífeyrir opinberra starfsmanna. Upplýsinga um lífeyrissamninga á vinnustað skal leita hjá atvinnurekanda.
Einstaklingsbundinn lífeyrir er sparnaður sem einstaklingur stofnar sjálfur til hjá fjármálastofnun eða lífeyrissjóði og er ótengdur atvinnurekanda.
Flestar danskar fjármálastofnanir og lífeyrissjóðir eru skráðir á upplýsingasíðu um lífeyri, Pensionsinfo. Þar getur hver og einn fundið yfirlit yfir lífeyrisstöðu sína. Þú þarft að skrá þig inn með MitID.
Ef spurningar vakna um lífeyrisstöðu skal hafa samband við lífeyrissjóð viðkomandi eða fjármálafyrirtæki.
Nánari upplýsingar á vefslóðinni borger.dk.
Ef þú ert sjálfstætt starfandi
Sjálfstætt starfandi einstaklingar ávinna sér rétt til ellilífeyris eins og allir aðrir, þeir hafa ekki vinnumarkaðslífeyri en geta valið hvort þeir vilja borga í ATP, lífeyri til æviloka.
Nánari upplýsingar á vefslóðinni borger.dk.
Nánari upplýsingar um lífeyrisgreiðslur í Danmörku
Nánari upplýsingar
Ef þú ert með spurningu eða ef þú hefur rekist á hindrun í norrænu landi skaltu fylla út eyðublað okkar.
ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.