Réttur til heilbrigðisþjónustu í Danmörku

Þegar þú flytur til Danmerkur frá öðru Norrænu landi áttu alla jafna að skrá þig í þjóðskrá í því sveitarfélagi sem þú hyggst búa í. Þá færðu danskt sjúkratryggingaskírteini. Skírteinið er sent á danska heimilisfangið þitt. Skírteinið sannar að þú hafir aðgang að allri heilbrigðisþjónustu í Danmörku. Einnig geturðu notað sérstakt app ef þú uppfyllir skilyrði til þess. Þú þarft að framvísa skírteininu í hvert sinn sem þú hefur samskipti við heilbrigðiskerfið.

Þegar þú flytur til Danmerkur eða hefur störf í landinu þarftu að veita Udbetaling Danmark upplýsingar um sjúkratryggingastöðu þína. Udbetaling Danmark metur hvort Danmörk eða annað land eigi að greiða fyrir það þegar þú nýtir þér danska heilbrigðisþjónustu.

Þú þarft til dæmis að upplýsa Udbetaling Danmark um það ef þú:

• þiggur lífeyrisgreiðslur frá öðru norrænu landi eða EES-landi, Sviss eða Bretlandi.
• þiggur annars konar félagslega aðstoð frá öðru norrænu landi eða EES-landi, Sviss eða Bretlandi, t.d. vegna fæðingarorlofs eða veikinda.
• hefur áður búið í Danmörku og sért að flytja þangað aftur.

Ef þú býrð í öðru norrænu landi en starfar í Danmörku nýturðu alla jafna danskra sjúkratrygginga. Einstaklingar sem eru almannatryggðir í Danmörku en búa ekki þar geta sótt um sérstakt sjúkratryggingaskírteini hjá Udbetaling Danmark. Skírteinið veitir rétt til danskrar heilbrigðisþjónustu á sömu kjörum og einstaklingar sem búa í Danmörku. Þú átt rétt á að fá skírteinið útgefið hjá Udbetaling Danmark. Þú þarft að framvísa því í hvert sinn sem þú átt samskipti við heilbrigðiskerfið.

Annaðhvort getur verið litið á þig sem „landamærastarfsmann“ (grænsearbejder( eða „launamann“ (arbejdstager). Udbetaling Danmark ákveður það út frá því hvort þú ferðist aftur til heimilis þíns í öðru norrænu landi a.m.k. einu sinni í viku eður ei. Burtséð frá því hefurðu fullan aðgang að danskri heilbrigðisþjónustu en ef þú att fjölskyldu sem einnig á að sjúkratryggja skiptir það máli fyrir aðra fjölskyldumeðlimi hvort þú teljist landamærastarfsmaður eða launamaður.

Sérstakt sjúkratryggingaskírteini gildir að hámarki í tvö ár. Gildistíminn kann að vera skemmri ef réttur þinn til kortsins tengist tímabundnum aðstæðum. Hægt er að sækja um skírteinið á borger.dk og nota má sjálfsafgreiðsluna án þess að hafa MitID-auðkenni.

Fyrirtæki geta sótt um sérstakt sjúkratryggingakort fyrir starfsfólk sitt á vefnum virk.dk.

Nánari upplýsingar um sérstakt sjúkratryggingakort er að finna á vefnum borger.dk. Ef þú ert með spurningar geturðu haft samband við Udbetaling Danmark, International Sygesikring. Nánari upplýsingar um danska sjúkratryggingu eru á vefsíðunni borger.dk og á vefsvæði Styrelsen for Patientsikkerhed.

Þegar maður er sjúkratryggður í Danmörku á maður að sækja um bláa ESB-sjúkratryggingaskírteinið í Danmörku. Í sumum tilvikum kann fólk að eiga rétt á kortinu þótt það búi erlendis, t.d. ef maður býr erlendis og vinnur í Danmörku. Skírteinið er staðfesting þín á rétti til að fá nauðsynlega læknisþjónustu meðan á tímabundinni dvöl stendur í öðru ESB- eða EES-landi, Sviss eða Bretlandi, t.a.m. ef þú veikist í fríi.

Maður þarf sjálfur að sækja um ESB-sjúkratryggingaskírteini. Það er gert rafrænt í gegnum borger.dk eða með því að hafa samband við Udbetaling Danmark ef maður hefur ekki MitID-auðkenni eða Digital Post.

Ef þú þiggur félagslegar greiðslur frá öðru norrænu landi, ESB- eða EES-landi eða Sviss, t.d. lífeyri eða greiðslur vegna barneigna eða veikinda, áttu að sækja um ESB-sjúkratryggingaskírteini í viðkomandi landi. Ef þú þiggur greiðslur frá Bretlandi áttu að sækja um breskt sjúkratryggingaskírteini. Ef spurningar vakna má hafa samband við Udbetaling Danmark.

Á heimasíðu framkvæmdastjórnar ESB er að finna upplýsingar um hvernig ESB-sjúkratryggingaskírteinið er notað við dvöl í öðrum ESB- eða EES-löndum, Sviss og Bretlandi. Á heimasíðu Styrelsen for Patientsikkerhed er að finna upplýsingar um sérstakan Norðurlandasamning um rétt á heimferð við veikindi.

Hafirðu greitt reikning fyrir meðhöndlun í öðru aðildarríki, sem þú telur að ESB-sjúkratryggingaskírteinið eigi að dekka, geturðu sótt um endurgreiðslu hjá dönsku sjúkraöryggisstofnuninni, Styrelsen for Patientsikkerhed. Sé kostnaðurinn vegna kaupa á heilbrigðisþjónustu í öðru ESB- eða EES-landi geturðu einnig sótt um endurgreiðslu hjá héraðinu sem þú býrð í í Danmörku. Umsóknin verður metin út frá því hvað þú getur fengið miðað við danskar reglur um styrki vegna læknisþjónustu. Óháð því hvort þú sækir um í gegnum sjúkraöryggisstofnunina eða héraðið geturðu valið að báðir kostir séu skoðaðir og því fengið endurgreiðslu samkvæmt þeim reglum sem besta niðurstöðu gefa. Bætur vegna lyfjakaupa í öðru ESB- eða EES landi er hægt að sækja um rafrænt hjá dönsku lyfjastofnuninni, Lægemiddelstyrelsen. Þú getur fengið aðstoð hjá sjúkraöryggisstofnuninni. 
 

Ef þú nýtur sjúkratrygginga í öðru norrænu landi og veikist meðan á tímabundinni dvöl í Danmörku stendur áttu rétt á læknisfræðilega nauðsynlegri meðferð meðan dvölin stendur yfir. Það getur jafnt átt við um bráð veikindi sem og fyrirliggjandi veikindi, svo sem króníska sjúkdóma, eða ef þú ert barnshafandi og þarft á eftirliti eða meðhöndlun að halda á meðan þú dvelst í Danmörku.

Yfirleitt er heilbrigðisþjónusta í opinbera heilbrigðiskerfinu í Danmörku endurgjaldslaus en þú þarft að geta sýnt fram á að þú njótir opinberra sjúkratrygginga í heimalandi þínu. Ef þú nýtur sjúkratrygginga í öðru norrænu landi þarftu að sýna skilríki ásamt því að gefa upp heimilisfang þitt. Einnig geturðu framvísað ESB-sjúkratryggingaskírteini.

Ef þú býrð í öðru norrænu landi og nýtur þar sjúkratrygginga er í sumum tilvikum hægt að sækja skipulagða meðferð í Danmörku. Kanna þarf hjá sjúkratryggingum í búsetulandinu hvort fyrirfram leyfi þurfi til að fá kostnað greiddan. Sú er oft raunin vegna meðferðar á sjúkrahúsi. Þú kannt einnig að eiga rétt á að greiða fyrir meðferðina og sækja um endurgreiðslu eftir á frá sjúkratryggingum í heimalandi þínu. Hafðu samband við sjúkratryggingar þínar til þess að fá nánari upplýsingar um þau skilyrði sem við eiga ef þú sækist eftir skipulagðri meðferð í Danmörku.

Athuga ber að í Danmörku kunna að vera kröfur um tilvísun frá lækni eða tannlækni vegna tiltekinna meðferða í opinbera heilbrigðiskerfinu. Það á meðal annars við um meðhöndlun á opinberum sjúkrahúsum og hjá ákveðnum sérlæknum.