Atvinnuleit í Svíþjóð
Atvinnuleit í Svíþjóð
Í Svíþjóð geturðu leitað að vinnu hjá vinnumiðlunum um allt land. Á vefsíðu Arbetsförmedlingen geturðu skráð þig í atvinnuleit, lesið atvinnuauglýsingar og vistað ferilskrá.
Opinberar vinnumiðlanir í ESB/EES-löndunum eru með samstarfsnet sín á milli sem nefnist EURES. Á vefsíðu EURES geturðu fundið laus störf í allri Evrópu og ráðgjafa EURES. EURES-ráðgjafar geta svarað spurningum um vinnu í Svíþjóð og öðrum ESB/EES-löndum.
Réttindi þín á sænskum vinnumarkaði
Mikilvægt er að þú þekkir réttindi þín á vinnumarkaði áður en þú hefur störf í Svíþjóð til þess að tryggja að starfskjörin séu í lagi. Þú getur leitað upplýsinga hjá stéttarfélaginu í þinni grein.
Atvinnuleit í Svíþjóð á bótum frá heimalandinu
Ef þú ert á atvinnuleysisbótum í norrænu ríki og hyggur á atvinnuleit í Svíþjóð geturðu fengið bætur í þrjá mánuði á meðan þú ert í atvinnuleit í Svíþjóð. Skilyrðið er að þú sért á atvinnuleysisbótum og uppfyllir hugsanlega fleiri skilyrði í landinu þar sem bæturnar eru greiddar út.
Til þess að fá dagpeninga við atvinnuleit í Svíþjóð þarftu að vera með vottorð PD U2 (N-303 ef þú flyst frá Færeyjum eða Grænlandi) frá þeirri opinberu stofnun sem greiðir bæturnar.
Við komuna til Svíþjóðar þarftu að skrá þig hjá vinnumiðlun. Sú stofnun í hinu landinu sem greiðir bæturnar heldur því áfram.
Hafðu samband við þá stofnun sem greiðir út atvinnuleysisbæturnar tímanlega fyrir ráðgerða brottför til Svíþjóðar til þess að afla þér upplýsinga um sérstök skilyrði, tímafresti og hugsanlega bið eftir afgreiðslu málsins.
Ef þú finnur enga vinnu í Svíþjóð áður en þrír mánuðir eru liðnir þarftu að snúa aftur til landsins þar sem þú ert atvinnuleysistryggð/ur og á bótum og skrá komu þína hjá atvinnuleysistryggingasjóðnum. Ef þú gerir það ekki missir þú rétt þinn til atvinnuleysisbóta.
Ef þú finnur vinnu í Svíþjóð þarftu yfirleitt að vera atvinnuleysistryggð/ur þar í landi. Það þýðir að þú þarft að skrá þig í sænskan atvinnuleysistryggingasjóð. Þú þarft PD U1-vottorð til að flytja réttindi þín til atvinnuleysistryggingar frá einu landi til atvinnuleysistryggingasjóðs í Svíþjóð. Vottorðið fæst hjá atvinnuleysistryggingarsjóði eða viðkomandi yfirvöldum í því landi sem þú ert atvinnuleysistryggð/ur.
Mikilvægt er þú skráir þig í sænskan atvinnuleysistryggingasjóð frá þeim degi sem þú hefur störf í Svíþjóð því það getur valdið vandræðum ef tryggingartímabilið rofnar.
Ef þú ert með spurningu skaltu fylla út eyðublaðið hérna:
ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.
