Réttur til heilbrigðisþjónustu í Finnlandi

Ef þú býrð eða starfar í Finnlandi átt þú rétt á heilbrigðisþjónustu þar,svo sem almennri heilbrigðisþjónustu og þjónustu sérfræðilækna, auk niðurgreiðslu á lyfja- og ferðakostnaði. Í Finnlandi er einnig hægt að fá heilbrigðisþjónustu á vegum einkaaðila. Að auki bera vinnuveitendur ábyrgð á að sjá starsfólki sínu fyrir fyrirbyggjandi heilbrigðisþjónustu.

Þú átt einnig rétt á vissri þjónustu meðan þú dvelur tímabundið í Finnlandi. Að auki áttu rétt á að sækja tiltekna heilbrigðisþjónustu í öðru norrænu landi meðan þú býrð í Finnlandi, eða í Finnlandi meðan þú býrð í öðru norrænu landi.

Einstaklingar búsettir í Finnlandi samkvæmt þjóðskrá eiga rétt á heilbrigðisþjónustu á vegum hins opinbera á heilsugæslustöð eða sjúkrahúsi í sinni heimabyggð. Einnig er hægt að leita til einkarekinna heilsugæslustöðva. Vinnuveitendur sjá yfirleitt um að sjúkratryggja starfsfólk sitt. Námsfólk getur einnig leitað til heilsugæslustöðva háskólanna.

Kela-kort og evrópska sjúkratryggingakortið

Handhafi Kela-korts á rétt á niðurgreiðslu frá finnskum sjúkratryggingum. Það er nauðsynlegt að hafa Kela-kort til að fá kostnað á einkareknum heilsugæslustöðvum niðurgreiddan.

Þú getur sótt um Kela-kort og ýmiss konar bætur og styrki frá Kela (finnsku almannatryggingastofnuninni) á þínu svæði á vefsíðu Kela. Ef þú hefur ekki sótt um bætur eða Kela-kort áður og ert þegar flutt(ur) til Finnlands skaltu líka tilkynna um flutninginn. Þú færð skriflegt svar við bótaumsókn þinni. Sé litið svo á að þú hafir flutt varanlega til Finnlands færðu Kela-kort sent í pósti. Nánari upplýsingar á síðunni Að tilkynna flutninga og skrá sig í þjóðskrá í Finnlandi.

Fólk sem er sjúkratryggt í Finnlandi hefur einnig rétt á að fá evrópskt sjúkratryggingakort frá Kela (European Health Insurance Card, EHIC). Það veitir rétt til skjótrar heilbrigðisþjónustu án endurgjalds þegar ferðast er eða dvalið tímabundið í öðru ESB- eða EES-landi, Sviss, Bretlandi eða Norður-Írlandi.

Niðurgreiðsla sjúkrakostnaðar

Hægt er að fá niðurgreiddan lyfjakostnað í sumum tilfellum, einnig hluta af kostnaði vegna einkarekinnar heilbrigðisþjónustu og ferðakostnaði vegna læknismeðferðar.

Niðurgreiðslu vegna lyfjakostnaðar færð þú beint frá apótekinu. Gjald vegna þjónustu lækna á einkareknum heilsugæslustöðvum er niðurgreitt á staðnum á grundvelli sjúkratrygginga, gegn framvísun Kela-korts. Annars er hægt að sækja um endurgreiðslu frá Kela innan sex mánaða. Til að sækja um endurgreiðslu þarf að fylla út eyðublað.

Sjómenn og einstaklingar sem vinna á landamærasvæðum í Finnlandi eiga rétt á heilbrigðisþjónustu í því landi sem unnið er í, auk búsetulandsins. Það land sem viðkomandi er sjúkratryggður í ber kostnaðinn af þjónustunni.

Ef þú ert sjúkratryggð/t/ur í öðru norrænu landi og veikist skyndilega í Finnlandi átt þú rétt á meðferð við veikindum þínum. Ef þú ert sjúkratryggð/t/ur í öðru norrænu landi þarft þú að framvísa vegabréfi eða öðrum opinberum skilríkjum og taka fram að lögheimili sé í öðru norrænu landi. Einnig er hægt að framvísa evrópsku sjúkratryggingakorti.

Íbúar í Finnlandi geta sótt læknismeðferð í öðru norrænu landi, óski þeir þess,en þar eru Álandseyjar þó undanskildar. Þú getur sótt um læknismeðferð erlendis með samþykki frá finnskum sjúkratryggingum, en slíkt samþykki er þó ekki alltaf nauðsynlegt. Hafi meðferð ekki verið samþykkt fyrir fram er oft hægt að sækja um endurgreiðslu eftir á frá sjúkratryggingum í búsetulandinu.