Framhaldsskólanám í Finnlandi

Þú getur sótt um framhaldsskólanám í Finnlandi ef þú hefur lokið grunnskólanámi eða sambærilegu námi. Einnig þeir nemendur sem lokið hafa grunnskóla eða sambærilegu námi í öðrum löndum en Finnlandi geta sótt um menntaskóla- eða iðnnám þar. Almennar upplýsingar um nám á framhaldsskólastigi eru á vefsvæði StudyInfo.

Norrænu löndin hafa gert með sér samning sem tryggir að nemendur eigi möguleika á að sækja um menntaskóla- og iðnnám í öðru norrænu landi á sama grundvelli og umsækjendur frá viðkomandi landi. Samningurinn skuldbindur aðildarlöndin einnig til þess að viðurkenna nám sem lokið hefur verið í öðru norrænu landi. Nánari upplýsingar eru á vefsvæði Finlex.

Ef þú hefur áhuga á framhaldsskólanámi á Álandseyjum skaltu kynna þér efni síðunnar Leiðbeiningar: Nám á Álandseyjum.

Í Finnlandi er hægt að stunda nám á framhaldsskólastigi í menntaskólum og iðnskólum.

Menntaskólanám í Finnlandi

Finnskir menntaskólar veita almenna bóklega menntun á breiðum grundvelli og góðan undirbúning fyrir háskólanám. Menntaskólanám veitir engin formleg starfsréttindi.

Menntaskólanámið tekur þrjú ár að meðaltali og því lýkur alla jafna með stúdentsprófi. Stúdentspróf veitir nemandanum möguleika á að halda áfram námi á háskólastigi. Hægt er að ljúka menntaskólanámi án þess að þreyta stúdentspróf og öðlast þar með rétt til að sækja um iðnháskólanám eða starfsnám. Upplýsingar um einkunnagjöf finnur þú á síðunni Einkunnaskalar í Finnlandi.

Menntaskólar í Finnlandi eru ýmist ríkis- eða einkareknir. Námið og námsgögnin eru án endurgjalds fyrir skólaskylda nemendur. Nánari upplýsingar um skólaskyldu og nám án endurgjalds eru á vefsvæði StudyInfo.

Í finnskum menntaskólum er yfirleitt kennt á finnsku eða sænsku. Í stærri borgum eru einnig alþjóðlegir menntaskólar, þar sem stunda má nám á t.d. ensku, þýsku eða frönsku. Nánari upplýsingar um menntaskólanám eru á vefsvæðum StudyInfo og Fræðsluráðs í Finnlandi.

Iðnnám í Finnlandi

Iðnnám getur verið grunnnám eða meistaranám í iðngrein eða svonefnt sérhæft iðnnám. Algengasti iðnnámskosturinn fyrir ungmenni sem hafa lokið grunnskólanámi er að stunda iðnnám á grunnstigi í dagskóla. Fullorðnir geta stundað iðnnám með vinnu, sem veitir aukinn sveigjanleika.

Í grunnnámi finnskra iðnskóla þurfa allir nemendur að læra almenn fög, auk iðnnámsfaga. Í iðnskólunum er hægt að stunda menntaskólanám eða gangast undir stúdentspróf samhliða verklegum námsgreinum. Iðnnám og nauðsynlegt námsefni og námsgögn eru án endurgjalds fyrir skólaskylda einstaklinga.

Í iðnnámi er gerð persónusniðin áætlun um færniþróun (HOKS) fyrir hvern nemanda. Þannig er áætlað hvaða fög nemandinn mun taka og á hvaða hraða. Hluta af iðnnámi er yfirleitt lokið á vinnustað með námssamning eða starfsþjálfunarsamning sem grundvöll. Talað er um námssamning þegar námið fer aðallega fram á vinnustað í tengslum við verkefni þar. Námsfólk á námssamningi er ráðið á tiltekinn vinnustað og fær því laun á námstímanum. Hægt er að auka við nám á námssamningi eftir þörfum með námi í annars konar námsumhverfi. Í námi á grundvelli starfsþjálfunarsamnings stundar nemandinn einnig nám á vinnustað í tengslum við verkefni þar. Þá er um að ræða starfsþjálfun án ráðningar á vinnustaðnum. Nánari upplýsingar um námssamninga og starfsþjálfunarsamninga eru á vefsvæði fræðsluráðs í Finnlandi.

Í Finnlandi má stunda iðnnám á finnsku eða sænskuen námsframboð og námstungumál eru þó mismunandi eftir námsstofnunum. Lítið framboð er af iðnnámi á ensku og yfirleitt er sótt um inngöngu í slíkt nám milliliðalaust hjá viðkomandi skóla.​​​

Upplýsingar um einkunnagjöf finnur þú á síðunni Einkunnaskalar í Finnlandi. Að iðnnámi loknu er hægt að sækja un nám í iðnháskóla eða taka inntökupróf í háskóla.

Nánari upplýsingar um iðnnám eru á vefsvæðum StudyInfo og Fræðsluráðs í Finnlandi.

Undirbúningur fyrir nám á framhaldsskólastigi í Finnlandi

Áður en þú hefur nám á framhaldsstigi getur þú tekið grunn sem kallast TUVA-nám. TUVA-nám er ætlað nemendum á skólaskyldualdri, auk annarra sem ekki hafa lokið námi á framhaldsskólastigi og þurfa á undirbúningi að halda. Hægt er að sækja um inngöngu í TUVA-nám í sameiginlegri umsóknalotu að vori eða í opnu umsóknarferli allt árið. Nánari upplýsingar um TUVA-nám eru á vefsvæði StudyInfo.

Í Finnlandi er sótt um inngöngu í menntaskólanám eða iðnskólanám gegnum sameiginlega umsóknalotu á vefsvæðinu StudyInfo en þar eru einnig nánari upplýsingar um námsframboð og umsóknarferli. Sumar námsleiðir er einnig hægt að sækja um í opnu umsóknarferli allt árið. Umsóknarfrestir eru mismunandi eftir námsleiðum. Nánari upplýsingar eru á vefsvæði StudyInfo.

Hafi umsækjandi lokið grunnskólanámi í öðru landi en Finnlandi þarf hann að sjá til þess að afrit af prófskírteini berist til þeirrar stofnunar sem sótt er um nám við, áður en umsóknartíma lýkur. Hver og ein menntastofnun metur hvort taka eigi inn nemendur sem lokið hafa grunnskóla í öðru landi, þar sem ekki er alltaf um sambærilegt nám að ræða. Nánari upplýsingar um inntöku í nám á grundvelli mats eru á vefsvæði StudyInfo.

Einnig er hægt að sækja um iðnnám árið um kring í opnu umsóknarferli. Þá er sótt um beint hjá viðkomandi menntastofnun og eru umsóknarfrestir mismunandi á milli stofnana. Það eru einkum fullorðnir sem sækja um iðnnám í opnum umsóknarferli.

Hafir þú þegar lokið iðnnámi, námi á háskólastigi eða menntaskólanámi getur þú ekki sótt um nám að loknum grunnskóla í sameiginlegri umsóknalotu framhaldsskóla. Þú getur þó sótt um iðnnám í opnu umsóknarferli.

Nánari upplýsingar um nám að loknum grunnskóla eru á vefsvæði StudyInfo.

Þú getur líka komið til Finnlands sem skiptinemi eða stundað starfsnámshluta náms þíns í Finnlandi.

Sé stefnan tekin á nám í Finnlandi er líka gott að kynna sér stúdentaíbúðakerfið þar, fjármögnun náms í landinu, það að fá finnska námsgráðu viðurkennda í öðrum norrænum löndum og fleira sem gott er að hafa í huga. Við höfum safnað saman upplýsingum um þessi atriði á síðuna Leiðbeiningar: Nám í Finnlandi.

Á síðunum hér fyrir neðan finnur þú upplýsingar um nám á framhaldsskólastigi og hvernig sækja á um það í öðrum norrænum löndum.

Nánari upplýsingar